ТАВАҶҶӮҲИ ҶИДДӢ БА МУРОҶИАТҲОИ ШАҲРВАНДОН
2025-08-30 13:47:57
Рӯзи қабули раиси шаҳри Панҷакент Абдухолиқ Холиқзода, ки шанбеи ҳар ҳафта доир мешавад, имрӯз бо иштироки муовинони раиси шаҳр, роҳбарони корхонаю муассисаҳо, раисони ҷамоатҳои деҳот баргузор шуд.
Муроҷиату дархости шаҳрвандон ин навбат фарогири масъалаҳои таъминот бо қитъаи замини наздиҳавлигӣ, ҳалли баҳси замину чарогоҳ, расонидани кӯмаки молиявӣ, мусоидат барои бо ҷойи кор таъмин намудан, табобат, даъвати ҳарбии ҷавонон ва дигар соҳаҳо буд.
Зимни шунидани муроҷиатҳо ба муовинони раиси шаҳр, ниҳодҳои мақомоти иҷроияи маҳаллии ҳокимияти давлатии шаҳр, роҳбарони корхонаю муассисаҳо, раисони ҷамоатҳои деҳот барои омӯхтан ва мусоидат ба ҳалли қонунии онҳо дастур дода шуд.
Аз ҷумла, дар ҷараёни қабули шаҳрвандон ба сокини Ҷамоати деҳоти Косатарош, нафари солманди яккаю танҳо, ки аз бемории чашм азият мекашад, кӯмаки пулӣ расонида, барои табобати ӯ дар бемористони маркази вилоят масъулин муваззаф карда шуданд.
Таваҷҷӯҳи раисони ҷамоатҳои деҳот ба ҳалли қонунии арзу шикоят, муроҷиату дархости шаҳрвандони ҳудуди ҷамоати деҳот дар доираи салоҳиятҳояшон ҷалб карда шуд.
