Дар қисмати ғарбии шаҳри Панҷакент, дар оғози хиёбони Рӯдакӣ бо маблағгузории Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон ва дастгирии мақомоти иҷроияи маҳаллии ҳокимияти давлатии шаҳр бинои маъмурии Маркази минтақавии баҳисобгирии инфиродии раёсати Агентии суғуртаи иҷтимоӣ ва нафақа дар шаҳри Панҷакент сохта мешавад.

Директори Агентии суғуртаи иҷтимоӣ ва нафақаи назди Ҳукумати Ҷумҳурӣ Абдураҳмон Ҳалимзод ва раиси шаҳр Абдухолиқ Холиқзода бо рафти сохтмони он шинос шуданд. Ба пудратчӣ- ширкати бинокории “Сохтмон”, барои тезонидани суръати сохтмон, риояи қатъии тарҳи меъморӣ, сифати корҳо ва дар муҳлати пешбинишуда ба истифода додани он дастур дода шуд.

Гуфта шуд, ки рафти сохтмони бино зери назорати ҳамарӯзаи роҳбарияти Агентӣ ва мақомоти иҷроияи маҳаллии ҳокимияти давлатии шаҳр қарор дода мешавад.

Бино аз чор қабат ва таҳхона иборат буда, дар он барои фаъолияти кормандон ҳамаи шароити зарурӣ пешбинӣ шудааст.