Бо қарори Маҷлиси вакилони халқи шаҳри Панҷакент аз 11 марти соли 2026, № 81 яке аз кӯчаҳои маҳаллаи Самарқандии шаҳри Панҷакент ба номи ходими давлатӣ ва ҷамъиятӣ, ҷанговари байналмилал, собиқ раиси шаҳр Самадӣ Шакарбек Додхоҳ номгузорӣ карда шуд.

Дар маросими номгузории кӯча муовини раиси шаҳр Мурод Шукурзода, ҳамкорону дӯстони шодравон аз шаҳри Душанбе, Ҷумҳурии Ӯзбекистон аз саҳми арзанда дар рушди шаҳр, вилоят ва ҷумҳурӣ, хислатҳои хуби инсонии ӯ ёдоварӣ карданд.

Гуфта шуд, ки марҳум баъди хатми Донишкадаи техникии Тоҷикистон бо ихтисоси муҳандиси барқ дар вазифаҳои масъули давлатӣ- сардори шабакаҳои барқи шаҳри Душанбе, директори кулли “Тоҷикэнергонадзор”, мудири шуъбаи Дастгоҳи иҷроияи Президенти Ҷумҳурии Тоҷикистон, раиси шаҳри Панҷакент, муовини аввали раиси вилояти Суғд, муовини раиси шаҳри Душанбе кор карда, ҳамчунин соҳиби унвони илмии номзади илми иқтисод буд ва хидматҳои арзандаи ӯ бо мукофотҳои давлатӣ ва унвонҳои ифтихорӣ қадршиносӣ шудааст.

Дар давоми фаъолияти меҳнатӣ вакили Маҷлиси шаҳрӣ, вилоятӣ, Маҷлиси намояндагони Маҷлиси олӣ ва узви Маҷлиси миллии Маҷлиси Олии Ҷумҳурии Тоҷикистон интихоб шуда,то дами марг – 1 ноябри соли 2024, вазифаи муовини директори филиали Донишгоҳи энергетикии Москва дар шаҳри Душанберо ба ӯҳда дошт.

Арҷгузорӣ ба хидматҳои арзандаи ходими давлатӣ ва ҷамъиятӣ Самадӣ Шакарбек Додхоҳ таҷассуми сиёсати эҳтиромгузории Ҳукумати кишвар ба шахсиятҳои арзанда арзёбӣ карда шуд.