Соли равон кишоварзони шаҳри Панҷакент тасмим гирифтаанд, ки дар майдони 3137 гектар баъди ҷамъоварии ҳосили кишти асосӣ, кишти такрорӣ гузаронанд. То ин муддат дар майдони 2860 гектар картошка, шалғам, турб, сабзӣ, зироати хурокии чорво ва дигар зироат кишт карда шудааст.

Тавре зимни сафари кории раиси шаҳр Абдухолиқ Холиқзода ба Ҷамоати деҳори Ёрӣ гуфта шуд, кишоварзони хоҷагиҳои деҳқонӣ дар майдони 140 гектар баъди ҷамъоварии ғалла, картошкаи барвақтӣ кишти такрорӣ гузарониданианд ва ҳоло кишт идома дорад.

Таҷрибаи деҳқонони варзида собит кардааст, ки дар иқлими ин ҷо сабзӣ, шалғам, ҷуворимакка, бодиринг , турб ва дигар зироати зудрас дар кишти такрорӣ ҳосил хуб медиҳад.

Дар боғҳои хоҷагиҳои деҳқонии ҳудуди Ҷамоати деҳот низ ҳосил фаровон аст ва деҳқонон ҳоло ба ҷамъоварии меваҳои пешпазак низ пардохтаанд.

Дар ҷараёни боздид аз рафти кишти такрорӣ ҳамчунин аз фаъолияти пойгоҳи обкашӣ дидан намуда, ба роҳбарияти идораи беҳдошти замин ва обёрӣ барои таъмини мунтазами он дастур дода шуд.

БОЗДИДИ РАИСИ КУМИТАИ МЕЪМОРӢ ВА СОХТМОН

АЗ ШАҲРИ ПАНҶАКЕНТ

Бо дастури Ҳукумати Ҷумҳурӣ раиси Кумитаи меъморӣ ва сохтмони назди Ҳукумати Ҷумҳурии Тоҷикистон Мирзозода Низом Юсуфӣ дар раъси як гурӯҳ масъулон ва мутахассисони Кумита бо мақсади шиносоӣ бо рафти корҳои созандагию бунёдкорӣ ба ифтихори 35- солагии истиқлоли давлатии Ҷумҳурии Тоҷикистон аз шаҳри Панҷакент боздид намуданд.

Дар оғози боздид онҳо бо ҳамроҳии раиси шаҳр Абдухолиқ Холиқзода бо рафти бунёди як қатор иншоот, аз ҷумла Майдони Фирдавсӣ, беморхонаи кӯдакон шинос шуда, аз мавъеъе, ки барои бозори ояндаи шаҳрӣ пешбинӣ шудааст ва бинои маъмурии Кумиҷроияи шаҳрии ҲХДТ дидан намуда, ба масъулини шаҳрдорӣ маслиҳату машварат доданд.

Баъди боздид дар мақомоти иҷроияи маҳаллии ҳокимияти давлатии шаҳр бо кормандони бахши шаҳрсозию меъморӣ, роҳбарони ширкатҳои бинокории шаҳр машварат доир шуд.

Дар машварат раиси Кумитаи меъморӣ ва сохтмон зимни ибрози мулоҳизаҳо аз раванди бунёди иншоот ва корҳои ободонӣ ба муносибати 35-солагии истиқлоли давлатии Ҷумҳурии Тоҷикистон таъкид намуд, ки бо дастгирии мақомоти иҷроияи маҳаллии ҳокимияти давлатии шаҳр бунёди 984 иншооти таъиноти гуногун ба нақша гирифта, то кунун 760 тои он мавриди истифода қарор гирифта,ҳоло дар 127 иншоот корҳо идома доранд.

Гуфта шуд, ки Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҷараёни ташриф ба шаҳри Панҷакент зимни ифтитоҳи як қатор иншооти таъиноти истеҳсолӣ ва иҷтимоӣ ба корҳои бунёдкорию ободонӣ,сифати иншооти бунёдшуда баҳои баланд доданд ва ин боиси ифтихори сохтмончиёни шаҳр аст.

Дар идомаи машварат таваҷҷӯҳи масъулини шуъбаю бахшҳои марбутаи мақомоти иҷроияи маҳаллии ҳокимияти давлатии шаҳр, роҳбарони ширкатҳои бинокорӣ, муассисаҳои лоиҳакашӣ ба такмили нақшаи генералии шаҳр, таҳияи лоиҳаҳои биноҳо, сифати сохтмон, таъмини бақодории онҳо, ворид намудани унсурҳои миллӣ дар лоиҳаҳо, ба меъёрҳои сохтмонӣ мутобиқ гардонидани мавзеъи сохтмони биноҳои баландошёнаи истиқоматӣ, фаъолияти ширкатҳои лоиҳакашӣ, аз санҷиши ҳатмӣ гузаронидани лоиҳаҳои иншоотҳо ва риояи дигар меъёрҳои сохтмон ҷалб карда шуд.

Дар анҷоми машварат ба раиси шаҳр Абдухолиқ Холиқзода нишони унвони “Бинокори фахрии Ҷумҳурии Тоҷикистон”, сарварони ширкатҳои сохтмонии “СУ-3”– Абдулло Азизмуродов, “Сомон- бинокор” Баҳодур Насриддинов, “Асл”- Саъдулло Иноятов, “Панҷакентсоз”- Абдумаин Қодиров, “КСМ-278”- Олим Саидов барои саҳми арзанда дар корҳои ободию созандагӣ ифтихорномаи Кумитаи меъморӣ ва сохтмони назди Ҳукумати Ҷумҳурии Тоҷикистон тақдим карда шуд.

Натиҷаҳои иштироки дастаи футболи “Саразм”дар мавсими аввали чемпионати лигаи якуми футболи мамлакат дар мулоқоти раиси шаҳри Панҷакент Абдухолиқ Холиқзода бо роҳбарияти даста ва аъзоёни Федератсияи футболи шаҳр мавриди баррасӣ қарор гирифт.

Аз ҷумла, гуфта шуд, ки натиҷаҳои бозиҳои даста дар мавсими аввал қаноатбахш нестанд ва он аз 13 бозӣ нӯҳ бозиро бохта, се бозиро мусовӣ анҷом дода, танҳо дар як бозӣ ғолиб омадааст.

Зимни пурсиш аз бахши кор бо ҷавонон ва варзиш, ҳайати мураббиёни даста, сармураббии нави он сабабу омилҳои ин вазъ муайян намуда, барои дар даври дуюми мавсим куллан дигар намудани усули бозӣ, ба ҳайати даста ҷалб намудани бозигарони ҳунарманд, беҳтар кардани муҳити муносибатҳо дар он, омода намудани варзишгарони ҷавон ва ноил шудан ба натиҷаҳои назаррас дастуру маслиҳат дода шуд.

Таъкид шуд, ки мақомоти иҷроияи маҳаллии ҳокимияти давлатии шаҳр, Федератсияи футболи шаҳр барои ба натиҷаҳои беҳтар соҳиб шудани даста дар даври дуюми мавсими футболи соли ҷорӣ фаъолона мусоидат менамояд.

Дар доираи сиёсати дарҳои боз, ки Ҳукумати Ҷумҳурии Тоҷикистон дар робита бо кишварҳои хориҷа пеш гирифтааст, ҳамкориҳои гуногунҷабҳа бо мамолики дуру наздик густариш меёбад.

Дар ин замина, дирӯз раиси шаҳри Панҷакент Абдухолиқ Холиқзода сафири фавқулода ва мухтори Ҷопон дар Ҷумҳурии Тоқикистон, хонум Фурута Кейкоро, ки бо сафари корӣ дар шаҳр қарор дошт ба ҳузур пазируфт.

Зимни сӯҳбат ҷонибҳо аз густариши ҳамкориҳои иқтисодӣ дар доираи қарордод ва лоиҳаҳои гуногун байни Тоҷикистон ва Ҷопон дар самтҳои гуногун изҳори қаноатмандӣ намуданд. Аз ҷумла, ба хонуми сафир барои дастрас намудани таҷҳизоти тиббӣ ба беморхонаи марказии шаҳр изҳори сипос карда шуд.

Изҳори умед карда шуд, ки чунин ҳамкорҳо минбаъд низ идома дода хоҳад шуд.

Дидорбинӣ бо собиқадорони варзида ва аёдати ашхоси бемор, дастгирии онҳо аз масъалаҳоест, ки пайваста мавриди таваҷҷӯҳи мақомоти иҷроияи маҳаллии ҳокимияти давлатии шаҳри Панҷакент қарор дорад.

Дар ин росто раиси шаҳри Панҷакент Абдухолиқ Холиқзода раиси Ҷамоати деҳоти Саразм Дилнавоз Султоноваро, ки ҳоло баъди ҳодисаи нохушӣ нақлиётӣ табобат мегирад, аёдат намуд.

Дар сӯҳбат гуфта шуд, ки ӯ солиёни зиёдест дар хидмати давлатӣ қарор дорад ва вазифаи раиси ҷамоати деҳоти калонтарини шаҳрро низ бо камоли масъулият ба ҷо меорад ва ин хидматҳои ӯ қадршиносӣ ҳам карда мешавад. Ба ӯ сиҳатии комилу оҷил орзу карда шуд.

Дар деҳаи Нуристони Ҷамоати деҳоти Чинор ин рӯз раиси шаҳр ҳамчунин бо собиқадори меҳнат Бобоназар Ёқубов, ки солиёни зиёд дар рӯёнидани ҳосили фаровони зироати кишоварзӣ саҳм гузоштааст ва ҳоло давлати пирӣ меронад, сӯҳбати самимӣ доир намуд ва ба ӯ тӯҳфаҳои пулию молии мақомоти иҷроияи маҳаллии ҳокимияти давлатии шаҳр тақдим карда шуд.

Рӯзи 19 июли соли равон ҳайати экспедитсияи “Саёҳат ба қалби Авруосиё - 2025”-ро дар шаҳри Панҷакент пазироӣ намуданд.

Ҳайати экспедитсияи сайёҳии “Саёҳат ба қалби Авруосиё -2025”, ки аз намояндагони ҷавонон ва блогерҳо ва доираҳои соҳибкории давлатҳои Русия, Қазоқистон, Ӯзбекистон, Тоҷикистон ва Қирғизистон иборат буда,санаи 6 июн аз Русия сафарро оғоз намуда, аз ҳудуди ҷумҳуриҳои Осиёи Марказӣ 7400 километрро тай намуданд намояндагони мақомоти иҷроияи маҳаллии ҳокимияти давлатии шаҳр, ҷавонон дар дидбонгоҳи сарҳадии Саразм бо меҳмоннавозии хоси тоҷикона, нону асал, карнаю сурнай ва гулу гулдаста пешвоз гирифтанд.

Дар ҷараёни боздид меҳмононро раиси шаҳри Панҷакент Абдухолиқ Холиқзода ва муовини раиси вилояти Суғд Анвар Яъқубӣ ҳамроҳӣ намуданд.

Ҳайати экспедитсия давоми ду рӯз тибқи барнома аз шаҳраки бостонии Саразм, осорхонаи ба номи Рӯдакӣ, минтақаи сайёҳии Ҳафткӯл, ёдгории меъмории Хоҷа Муҳаммади Башоро, хона- музеи Шоири Халқии Тоҷикистон Лоиқ Шералӣ дар деҳаи Мазор, оромгоҳи сардафтари адабиёти класикии тоҷику форс Абӯабдуллоҳи Рӯдакӣ дар деҳаи Панҷруд дидан намуданд.

Дар маросими расмии қабули ҳайати экспедитсия муовини раиси вилояти Суғд ва раиси шаҳри Панҷакент онҳоро ба шаҳри Панҷакент , вилояти Суғд ва Ҷумҳурии Тоқикистон хушомадед гуфта, онро ҷавобгӯи сиёсати сулҳдӯстонаи Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва иқдоми шоиста дар раванди тавсеаи сулҳу дӯстӣ, робитаю ҳамкорӣ дар байни мардуми Иттиҳоди Давлатҳои Мустақил ва рушди соҳаи сайёҳӣ унвон намуданд.

Экспедитсия рӯзи 22 июл дар шаҳри Душанбе бо баргузории конфронси байналмилалии доираҳои соҳибкории давлатҳои иштирокчии он анҷом меёбад.

Пойгоҳи обкашии деҳаи Боғчаи Ҷамоати деҳоти Шинги шащри Панҷакент, ки тавассути он даҳҳо гектар заминҳои хоҷагиҳои деҳқонӣ ва шахсии ин деҳа ва деҳаи Ғӯсари Ҷамоати деҳоти Лоиқ Шералӣ шодоб мешуданд, баъди таҷдид аз нав мавриди истифода қарор дода шуд.

Тавре зимни боздиди раиси шаҳр Абдухолиқ Холиқзода гуфта шуд, дар пойгоҳ бо маблағгузории мақомоти иҷроияи маҳаллии ҳокимияти давлатии шаҳр тибқи лоиҳаи ҶСК “Корезлоиҳа”-и Кумитаи давлатии сохтмон ва меъморӣ аз ҷониби пудратчӣ- ҶДММ “ Ориён КС” дар мӯҳлати кӯтоҳ ҳаракатдиҳанда, насоси нав насб карда, дар масофаи 1400 метр лӯлаҳои полиэтилении қутраш 400 мм хобонида шуд.

Пойгоҳи нав аз санҷиш гузашта, тавассути он ҳолати мелиоративии беш аз 300 гектар заминро беҳтар кардан мумкин аст.

Ҳоло дар пойгоҳ корҳои охирини омодагӣ ба истифодаи доимии он анҷом дода мешавад.

Дар маҷлиси фаъолони шаҳри Панҷакент, ки имрӯз баргузор шуд, натиҷаҳои фаъолияти иқтисодию иҷтимоии шаҳр дар нимсолаи аввали соли 2025 мавриди баррасӣ қарор гирифт.

Дар оғози ҷаласа, ки бо иштироки раиси шаҳр Абдухолиқ Холиқзода, намояндаи мақомоти иҷроияи маҳаллии ҳокимияти давлатии вилояти Суғд, мудири шуъбаи рушди иҷтимоӣ ва робита бо ҷомеаи дастгоҳи раиси вилоят Тоҷибой Султонзода, роҳбарони корхонаю муассисаҳо ва фаъолони шаҳр баргузор шуд, гуфта шуд, ки дастуру супоришҳои Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, ки зимни ташриф ба вилояти Суғд, аз ҷумла шаҳри Панҷакент, баён доштанд, моро ба тавсеаи корҳои ободонию созандагӣ, ҳалли масъалаҳои умдаи рӯз, ноил шудан ба дастовардҳо дар соҳаҳои иқтисодию иҷтимоӣ , истиқболи сазовори 35- солагии истиқлоли давлатии кишвари азизамон водор менамояд.

Дар ҷаласа зимни шунидани масъалаи асосии рӯзнома-““Ҷамъбасти натиҷаҳои рушди иқтисодию иҷтимоии шаҳри Панҷакент дар нимсолаи аввали соли 2025”, ки бо он муовини раиси шаҳр Эркин Хушвақтзода баромад кард, нишондиҳандаҳои асосии рушди иқтисодию иҷтимоии шаҳр дар соҳаҳои саноат, кишоварзӣ, воридот ба буҷет, роҳу нақлиёт, хидматрасонӣ ва дигари соҳаҳо мавриди таҳлил қарор дода шуд.

Дар ҷараёни баррасӣ аз муовинони раиси шаҳр оид ба фаъолияти соҳаҳои вобасташуда, роҳбарони як қатор корхонаю муассисаҳо пурсиш ба амал оварда, ҷиҳати ислоҳи нуқсонҳои ҷойдошта, тавсеаи корҳои бунёдкорию созандагӣ дастур дода шуд.

Дар ҷаласа намояндаи намояндаи мақомоти иҷроияи маҳаллии ҳокимияти давлатии вилояти Суғд Тоҷибой Султонзода сухан кард.

Дар ҷамъбасти ҷаласа раиси шаҳр оид ба иҷрои дастуру супоришҳое, ки Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон зимни ташриф ба шаҳри Панҷакент ва мулоқот бо фаъолони шаҳр баён доштанд, дар назди ниҳодҳои марбутаи мақомоти иҷроияи маҳаллии ҳокимияти давлатии шаҳр, роҳбарони корхонаю муассисаҳо вазифаҳои мушаххас гузошт.

Дар мулоқоти раиси шаҳри Панҷакент Абдухолиқ Холиқзода бо директори кулли корхонаи муштараки “ Броадтек- Тоҷикистон майнинг инвестмент лимитед” Ҷоотин Ҷонг, ки баъди танаффуси зиёд ҳоло корҳои омодагӣ барои ба кор андохтани он оғоз шудааст, масъалаҳои марбут ба раванди омодагии ин корхонаи муҳими саноати кӯҳӣ мараҳ карда шуданд.

Зимни мулоқот гуфта шуд, ки корхонаи мазкур соли 2015 баъди бунёди коргоҳи истеҳсолӣ дар ҳудуди деҳаи Рукнободи Ҷамоати деҳоти Ворӯ ба истихроҷ ва коркарди маъдани қалъагӣ ва мис дар кони мавзеъи Мушистон ба кор шурӯъ шурӯъ намуда буд ва ҳоло барои аз нав ба кор андохтани он тадбирҳо андешида мешавад.

Дар сӯҳбат ҷонибҳо масъалаҳои ба кор омода намудани коргоҳи истеҳсолӣ, таъмиру таҷдиди роҳ, таъминот бо барқ, об, ҷудо намудани замин барои бунёди коргоҳи нави коркард дар ҳудуди он ва дигар масъалаҳои омодагӣ ба оғози фаъолияти истеҳсолии корхонаро матраҳ намуданд.

Гуфта шуд, ки мақомоти иҷроияи маҳаллии ҳокимияти давлатии шаҳр дар ҳамкорӣ бо роҳбарияти корхона ва мақомоти соҳавии ҷумҳурӣ барои ҳарчи зудтар ба кор андохтани корхона мусоидат менамояд.

Дар фароғатгоҳи иттифоқи касабаи соҳаи маорифи шаҳри Панҷакент, ки дар мавзеъи хушобу ҳавои Чиларчаи Ҷамоати деҳоти Саразм воқеъ аст, сад нафар хонандагони муассисаҳои таълимии шаҳр ба истироҳат фаро гирифта шудаанд.

Тавре иттилоъ дода шуд, имсол бо дастгирии мақомоти иҷроияи маҳаллии ҳокимияти давлатии шаҳр, шуъбаи маориф ва иттифоқи касабаи соҳа инҷо барои истироҳати хонандагон ҳамаи шароити зарурӣ муҳайё буда, онҳо рӯзе чор маҳал бо хуроки серғизо таъмин карда, дар хобгоҳи барҳаво истироҳат менамоянд. Майдончаи варзишӣ, ҳавзи шиноварӣ низ дар ихтиёри хонандагон аст ва онҳо тибқи реҷа бо роҳнамоии мураббияҳо ба мусобиқаҳои варзишӣ, шеърхонӣ, расмкашӣ, мутолиаи адабиёти бадеӣ, шатранҷу шашкабозӣ машғул мешаванд. Вазъи саломатии онҳо зери назорати духтур қарор дорад.

Дар давраи таътили тобистона дар се навбат дар “Чиларча” 300 нафар хонандагон ба истироҳат фаро гирифта мешаванд.

Дар маҷлиси Кумитаи иҷроияи Ҳизби Халқии Демократии Тоҷикистон дар шаҳри Панҷакент, ки бо иштироки раиси шаҳр Адухолиқ Холиқзода, намояндаи Кумитаи иҷроияи вилоятии ҳизб, вакилони маҷлисҳои шаҳрию вилоятӣ, раисони ташкилотҳои ибтидоӣ, собиқадорон ва фаъолони ҳизб баргузор шуд, масъалаи пешбарии номзад ба вакили Маҷлиси вакилони халқи вилояти Суғд мавриди баррасӣ қарор гирифт.

Зимни баррасии масъалаи рӯзномаи ҷаласа- пешбарии номзад ба вакили Маҷлиси вакилони халқи вилояти Суғд дар ҳавзаи интихоботии Панҷакент № 23 ба ҷойи вакили хориҷшуда, бо розигии аъзоёни Кумитаи иҷроия номзадии Ҳабибзода Умедҷон Лутфулло – директори бахши минтақавии Агентии “Тоҷикстандарт” аз ин ҳавзаи интихоботӣ ба Маҷлиси вакилони халқи вилоят номзад пешбарӣ карда шуд.

Дар ҷаласа раиси шаҳр бо ҷонибдорӣ аз номзади пешбаринамудаи Кумитаи иҷроияи шаҳрии ҲХДТ, аз фаъолони ҳизб даъват ба амал овард, ки дар корҳои созандагию ободонӣ, ки ҳоло дар шаҳр ҷараён дорад, тарғиби ғояҳои ҳизб, ки ба баланд бардоштани маърифати сиёсии аҳли ҷомеа нигаронида шудааст, фаъолона иштирок намоянд.

Ин манзараҳо, ки аз иншооти бунёдшавандаи шаҳри Панҷакент аксбардорӣ шудааанд, як умумият доранд: дар онҳо маноракранҳо ба назар мерасанд.

Ин далели раванди созандагию бунёдкориҳоест, ки мақомоти иҷроияи маҳаллии ҳокимияти давлатии шаҳр бо раҳнамоиҳои Пешвои муаззами миллат, Президенти Ҷумҳурии Тоҷикистон,муҳтарам Эмомалӣ Раҳмон ва дастурҳои раиси вилояти Суғд, муҳтарам Раҷаб Аҳмадзода ба ифтихори ҷашни бузурги 35- солагии истиқлоли давлатии Ҷумҳурии Тоҷикистон роҳандозӣ намудааст.

Ба истиқболи ҷашни 35-солагии истиқлоли давлатии Ҷумҳурии Тоҷикистон дар шаҳр бунёди 984 иншоот пешбинӣ шуда, давоми солҳои 2021- 2024 ва 5 моҳи соли 2025 – 756 иншооти таъиноти гуногун, аз ҷумла, 44 корхонаву коргоҳҳои истеҳсолӣ, 31 иншооти соҳаи тандурустӣ, 59 иншооти соҳаи маориф, 32 иншооти варзишӣ, 9 иншооти истироҳатӣ - фарҳангӣ, 21 иншооти сайёҳӣ ва меҳмонхонаҳо, 117 маркази савдо ва хизматрасонӣ, 15 бинои баландошёнаи истиқоматӣ, 36 пул, 7 бинои маъмурӣ ва 321 адад дигар намуди иншоот ва дар маҷмӯъ 77,2 фоизи онҳо мавриди истифода қарор дода шудааст.

Ҳоло дар зиёда аз 80 иншоот, аз ҷумла дар беш аз 40 бинои истиқоматии бисёрошёна бо марказҳои савдо ва хизматрасонӣ, 1 бинои беморхонаи минтақавӣ, 4 бинои муассисаҳои таълимӣ ва 1 меҳмонхона, 1 бинои маъмурӣ кор идома дошта, дар онҳо 1720 нафар бо ҷои кор таъмин шудаанд.

Дирӯз бо иштироки раиси шаҳри Панҷакент Абдухолиқ Холиқзода ва намояндагони шарикони рушд ба маҳали нави аҳолинишин, ки дар қарибии деҳаи Гулистони Ҷамоати деҳоти Ворӯ бунёд мешавад, санги асос гузошта шуд.

Тавре зимни гузоштани санги асос ва муаррифии лоиҳаи деҳаи нав гуфта шуд,он дар доираи ҳамкориҳои Ҳукумати Ҷумҳурии Тоҷикистон бо Амороти Муттаҳидаи Араб бо дастгирии мақомоти иҷроияи маҳаллии ҳокимияти давлатии шаҳр ва сармоягузории ташкилоти байналмилалии хайриявии Шарҷа аз ҷониби ташкилоти ҷамъиятии хайриявии “Тоҷикистон” бунёд карда мешавад.

Тибқи лоиҳа дар навбати аввал дар деҳаи нав, ки дар заминҳои бо қарори Ҳукумати мамлакат ва мақомоти иҷроияи маҳаллии ҳокимияти давлатии шаҳр барои оилаҳои эҳтиёҷманд ҷудо шуда буд, ҷойгир аст, барои 25 оилаи эҳтиёҷманди Ҷамоати деҳоти Ворӯ хонаҳои истиқоматии дорои се ҳуҷраи истиқоматӣ ва дигар ҳуҷраҳои ёрирасон сохта, хати барқ ва оби нӯшокӣ гузаронида,бунёди бинои муассисаи таълимӣ ва нуқтаи тиббӣ низ дар назар дошта шудааст.

Тибқи нақша маҳали истиқоматии нав то ҷашни 35- солагии истиқлоли давлатии Ҷумҳурии Тоҷикистон бунёд шуда, ба эҳтиёҷмандон тақдим карда мешавад.

Зимнан, бо саҳмгузории ин ташкилоти хайриявии байналмилалӣ ва дастгирии мақомоти иҷроияи маҳаллии ҳокимияти давлатии шаҳр чанд сол қабл дар деҳаи Ворӯ бинои муассисаи таълимӣ ва бунгоҳи тиббӣ сохта шуда буд.

-Мо ваҳдати миллиро дар баробари истиқлоли давлатӣ як рукни муҳими давлатдорӣ ва шарти аслии пешрафту шукуфоии Тоҷикистон медонем ва барои тақвият, таҳким, устуворӣ ва такомули минбаъдаи он бо дастгирии мардуми сарбаландамон ҳамаи тадбирҳои заруриро меандешем, - таъкид кардаанд Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон

Ин маънӣ имрӯз дар ҷамъомади тантанавӣ дар шаҳри Панҷакент бахшида ба 28- солагии ба имзо расидани Созишномаи истиқрори сулҳ ва ризоияти миллӣ- Рӯзи ваҳдати миллӣ, ки бо иштироки доираи всеъи фаъолон ва ҷавонон баргузор шуд, дар паёми табрикии муовини аввали раиси Маҷлиси миллии Маҷлиси Олии Ҷумҳурии Тоҷикистон, раиси вилояти Суғд муҳтарам Раҷаб Аҳмадзода, ки муовини аввали раиси вилоят Суҳайлӣ Қурбонзода ба ҳозирин ироа намуд ва сухани шодбошии раиси шаҳри Панҷакент Абдухолиқ Холиқзода ифода шуд.

Гуфта шуд, ки, ки ваҳдати миллӣ барои халқи мо неъмати бебаҳо, арзиши муқаддас, рамзи ҳувияту худогоҳӣ, кафили бақои давлату давлатдорӣ ва рамзи саодати наслҳои имрӯзу оянда буда, ба шарофати он сохти конститутсионӣ барқарор, хатари парокандагии миллати тоҷик ва аз байн рафтани давлати тоҷикон бартараф карда, барои таҳкими сулҳу субот, татбиқи лоиҳаҳои азими бунёдкорӣ, рушду нумӯи кишвар заминаи боэътимод гузошта шуд.

Барномаи ҷолиби ҳунарӣ, ки ваҳдати миллӣ, сулҳу салоҳ ва ободию осудагии Ватани азизамонро таҷассум менамуд, анҷомбахши ҷамъомади тантанавӣ буд.