Panjakent.tj - Хабарҳо

2025-11-13 14:00:15

БОЗДИД АЗ РАФТИ БУНЁДИ ИНФРАСОХТОРИ КОРГОҲИ КОРКАРДИ МАЪДАНИ СУРМА

Дар ҳудуди Ҷамоати деҳоти Моғиёни шаҳри Панҷакент дар доираи нақшаи  амалӣ намудани ҳадафҳои Солҳои рушди саноат эълон намудани солҳои  2022-2026  дар заминаи захираҳои азими кашфшудаи маъдани сурма бо маблағгузории ҶДММ “Канзи диёр” ва ҷалби шарикони рушд коргоҳи коркард ва ғанигардонӣ бунёд карда мешавад.

   Раиси шаҳр Абдухолиқ Холиқзода  дар сафари корӣ ба деҳоти Мо-иён  бо рафти  бунёди инфрасохтори коргоҳи ояндаи саноати кӯҳӣ, аз ҷумла хобгоҳ барои коргарон, шинос шуд.

   Иттилоъ дода шуд, ки  аз  деҳаи Оби борик  то мавзеъи Эҷам ба масофаи 14 километр роҳ кушода,  қумпӯш карда шудааст. Ҳамчунин  сохтмони ду шаҳрак барои кормандони муҳандисӣ- техникӣ ва коргарони коргоҳи оянда, ки дорои 300 ҷой мебошад, бо истифода аз масолеҳи ҳозиразамони бинокорӣ дар арафаи анҷомёбӣ қарор  дошта, дар онҳо барои будубоши коргарон ҳамаи шароити зарурӣ  муҳайё карда  мешавад. 

  Баробари ин ҳоло бозбинии захираҳои маъдани сурма, ки солҳои қаблӣ геологҳо кашф карда будаанд, аз ҷониби мутахассисони ватанӣ ва шарикони рушд идома дорад.

  Баъди ба истифода додани  ин коргоҳ дар он  дар навбати аввал ташкили беш аз ҳазор ҷойи кории нав барои мутахассисон ва коргарон дар назар дошта шудааст.

2025-11-13 11:39:42

СӮХТОР ДАР БОЗОРИ “ГУЛИСТОН”-И ШАҲРИ ПАНҶАКЕНТ

Шаби санаи 12 ноябри соли 2025,  тақрибан соати 22-ю 30 дақиқа дар бозори  “Гулистон”-и Ҷамъияти матлуботи шаҳри Панҷакент, воқеъ дар хиёбони Рӯдакии шаҳр, ки  дар он либосу пойафзол ва матоъу дигар мавод   фурӯхта мешавад,  сӯхтор сар зад.

  Тавре дар  қисми мустақили  № 35-уми  ҳарбикунонидашудаи хадамоти давлатии оташнишонии Раёсати  хадамоти давлатии оташнишонии вилояти Суғд оид ба муҳофизати шаҳри Панҷакент иттилоъ доданд, сӯхтор дар муддати кӯтоҳ масофаи 792 метри мураббаъро фаро гирифт.

  Барои хомӯш кардани сӯхтор ва пешгирии паҳн шудани он 11 нақлиёти оташнишонӣ ва обкашонӣ, кормандони хадамоти оташнишонӣ  сафарбар шуда, он соати 00,10 дақиқа иҳота карда, соати 02-ю 30 дақиқа хомӯш карда шуд.

  Санҷиши авалия нишон дод, ки аз сӯхтор 280 нуқтаи савдои дохили бозор ва 20 мағозаи шафати он зиёни ҷиддӣ дида, комилан сӯхтаанд.

  Дар ҷараёни хомӯш кардани сӯхтор  ба маблағи тақрибан 27 миллион сомонӣ молу амволи  дӯконҳои бозор  ва манзилҳои истиқоматии шафати он  аз сӯхтор эмин дошта шуд.

  Ҳоло дар ҷойи ҳодиса ҳайати кории мақомоти иҷроияи маҳаллии  ҳокимияти давлатии шаҳр, прокуратура, хадамоти оташнишонӣ ва шуъбаи Вазорати корҳои дохила дар шаҳри Панҷакент қарор дошта, сабабу омилҳои сар задани сӯхтор ва  ҳаҷми  зиёни расида муайян карда мешавад.

2025-11-12 09:51:18

ИФТИТОҲИ ПУЛ ВА НОНВОЙХОНА

Дар деҳаи Фароби деҳоти Фароби шаҳри Панҷакент дар заминаи нақшаи омодагиҳо ба 35-умин солгарди истиқлоли давлатии кишвар боз ду иншоот ба истифода дода шуд.

   Дар ҷараёни сафари корӣ ба  деҳоти Фароб  бо иштироки раиси шаҳр Абдухолиқ Холиқзода  дар мавзеъи Рӯйи дарёи деҳа  ду пул- барои нақлиёт ва  пиёдагузар, ки   бо харҷи 120 ҳазор сомонӣ аз ҷониби сокини деҳа  Абдураҳим Гургиев ва фарзандонаш сохта шудааст, мавриди истифода қарор дода шуд.

  Ҳамчунин дар ин рӯз дар маркази деҳа нонвойхонаи соҳибкор Олим Ҳамроқулов ба кор шурӯъ намуд.

  Раиси шаҳр  дар маросими ифтитоҳи ин иншоотҳо  дар сӯҳбат бо сокинони деҳа бо ҷонибдорӣ аз ин иқдомҳои ободкорӣ  онҳоро ба идомаи корҳои ободонии деҳа, омодагӣ ба кишту кори баҳорӣ даъват намуд.

2025-11-12 09:49:10

САФАРИ КОРӢ БА ДЕҲОТИ ФАРОБ ВА БОЗДИД АЗ МУАССИСАҲОИ ТАЪЛИМӢ...

 Бо дастгирии мақомоти иҷроияи маҳаллии ҳокимияти давлатии шаҳри Панҷакент   дар доираи нақшаи омодагӣ ба 35- солагии  истиқлоли давлатии Ҷумҳурии Тоҷикистон дар дурдастарин минтақаи шаҳр- деҳоти Фароб, барои  бунёд ва таъмиру таҷдиди муассисаҳои таълимӣ ва беҳдошти шароити таълим тадбирҳои амалӣ андешида мешавад.

  Зимни сафари кории раиси шаҳр Абдухолиқ Холиқзода  ба ҷамоати деҳот  дар назди муассисаи таҳсилоти миёнаи умумии № 10, ки беш аз ҳазор нафар хонандагонро ба таҳсил фаро мегирад, чор синфхонаи иловагӣ мавриди истифода қарор дода шуд.

  Гуфта шуд, ки ин синфхонаҳо бо саҳмгузории соҳибкорон ва волидон сохта шуда, дар онҳо дар ду баст дусад нафар хонандагон таҳсил мекунанд.

   Дар идомаи сафари корӣ бо рафти   сохтмони бинои иловагии  муассисаи таҳсилоти миёнаи умумии № 54, ки   бо маблағгузории  оилаи Ҳамроқуловҳо- соҳибкорони муваффақи деҳа, сохта мешавад, шинос гардида, ба ин иқдом баҳои баланд дода шуд.  Бино тибқи лоиҳа аз се ошёна, 14 синфхона, толори маҷлис, кабинети компутерӣ ва утоқҳои маъмурӣ иборат буда,  барои  700 нафар  хонанда дар ду баст пешбинӣ шудааст.

  Дар  маҳаллаи Олимободи деҳаи Фароб низ  бунёди  чор синфхонаи иловагӣ дар назди муассисаи таҳсилоти миёнаи умумии № 87  бо саҳмгузории сокинон идома дорад.

  Бо мавриди истифода қарор гирифтани  ин биною синфхонаҳои иловагӣ шароити таълим барои  900 нафар хонанда  беҳтар карда мешавад.

2025-11-09 09:22:38

ИСТЕҲСОЛИ МАСОЛЕҲИ БИНОКОРӢ - ЗАМИНА БАРОИ РУШДИ СОХТМОН.

Бо рушди корҳои ободкорию созандагӣ дар доираи нақшаи омодагиҳо ба ҷашни 35- солагии истиқлоли давлатии Ҷумҳурии Тоҷикистон, бунёди биноҳои баландошёнаи истиқоматӣ дар шаҳри Панҷакент талабот ба масолеҳи бинокорӣ  меафзояд. 

Дар ҳамин замина бо дастгирии мақомоти иҷроияи маҳаллии ҳокимияти давлатии шаҳри Панҷакент дар шаҳр ҳоло    коргоҳҳои коркарди қуму шағал  ташкил шуда, фаъолият мекунанд.

Корхонаҳои коркарди сангу қуму шағали ҶДММ “Маҳмадқул Меликов”-и соҳибкор Юсуф Меликов ва ҶДММ “Диёрии ҷавонӣ”-и  Мирзо Турсунов, ки дар соҳили дарёи Зарафшон   бунёд шудааанд, аз ҷумлаи онҳо мебошанд.

Зимни боздиди раиси шаҳр Абдухолиқ Холиқзода аз рафти фаъолияти  ин коргоҳҳо гуфта шуд, ки онҳо  бо механизмҳои зарурӣ таҷҳизонида шуда, 24 нафар ба кор фаро гирифта шудаанд ва эҳтиёҷони ширкатҳои бинокорӣ ва аҳолиро бо ин навъи масоеҳи бинокорӣ асосан таъмин менамоянд.

Ба соҳибмулкони корхонаҳо ҷиҳати васеъ намудани истеҳсолот, зиёд намудани истеҳсоли масолеҳи бинокорӣ, ҷалби бештари коргарон дастур дода шуд.

2025-11-09 09:21:02

САФАРӢ КОРӢ БА ДЕҲОТИ КОСАТАРОШ ВА БОЗДИД АЗ РАФТИ БУНЁДИ ИНШООТ...

Шиносоӣ ва назорат ба рафти корҳо ҷиҳати иҷрои нақшаи омодагиҳо ба ҷашни 35-солагии истиқлоли давлатии Ҷумҳурии Тоҷикистон, раванди ободкорию созандагӣ   дар маҳалҳо дар маркази тавааҷҷӯҳи мақомоти иҷроияи маҳаллии ҳокимияти давлатии шаҳри Панҷакент қарор дорад.

Дар ҳамин замина раиси шаҳр Абдухолиқ Холиқзода дар ҷараёни сафари корӣ  ба Ҷамоати деҳоти Косатарош бо рафти бунёди як қатор иншооти  таъиноти иҷтимоӣ ва истеҳсолӣ шинос шуд.

Дар деҳаи Чорбоғ бо рафти бунёди маҷмааи варзишӣ ва савдо, ки аз ҷониби соҳибкор Акмал Эшбобоев сохта мешавад, шинос шуда, ин иқдоми ӯ шоиста арзёбӣ карда шуд.

Маҷмааи варзишӣ аз толори варзиш, толорҳои бозии саққо ва бозии кӯдакон иборат буда, дар маркази савдо фурӯши масоҳи бинокорӣ ба роҳ монда мешавад.

Дар ҷараёни сафари корӣ ҳамчунин  бо сохтмони синфхонаҳои иловагӣ дар назди муассисаи таҳсилоти миёнаи умумии №81, бинои кӯдакистон дар деҳаи Нови чомоқ аз ҷониби соҳибкор Нарзулло Раҷабов, кӯдакистон дар маҳаллаи нави деҳаи Чорбоғ  шинос шуда, барои тезонидани суръати сохтмон, аз ҷумла дар фурсати кӯтоҳ болопӯш намудани боми  синфхонаҳои иловагӣ дастур дода шуд.

Зимни сафар, ҳамчунин  аз рафти бунёд ва азнавсозии пойгоҳи обкашии “Дашти калон-1” ва канал  дар деҳаи Косатарош, ки бо маблағгузории КМ “Зарафшон”  аз ҷониби пудратчӣ ҶДММ “Файзи куҳистон” бунёд мешавад ва барои обёрии  200 гектар замин пешбинӣ шудааст, дидан намуда, барои дар мӯҳлати пешбинишуда анҷом додани сохтмон маслиҳат дода шуд.

2025-11-05 13:17:02

ПАЁМИ ТАБРИКИИ раиси шаҳри Панҷакент Абдухолиқ Холиқзода ба муносибати Рӯзи Конститутсияи Ҷумҳурии Тоҷикистон

Ҳамдиёрони азиз!
 Бо як ҷаҳон таманниёти нек ҳамаи мардуми шарифи диёри бостониамонро ба муносибати Рӯзи қабули Конситутсияи Ҷумҳурии Тоҷикистон, ки  соҳибихтиёрӣ ва тамомияти арзиши кишварамонро таъмин намуда, кафили баробарҳуқуқии шахс, озодӣ, дӯстии халқу миллатҳо мебошад,  табрик менамоям.
  Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  барҳақ таъкид кардаанд, ки “Конститутсия барои аз байн бурдани хатаре, ки ба Истиқлоли давлатӣ таҳдид мекард, шароити зарурии ҳуқуқӣ муҳайё карда, барои аз нобудӣ наҷот додани давлати тозаистиқлоли тоҷикон ва аз парокандагӣ раҳоӣ бахшидани миллати тоҷик асос гузошт, ҷиҳати расидан ба ваҳдати миллӣ таҳкурсии устувор гардид ва дар он марҳалаи ҳассоси таърихӣ барои гузоштани асосҳои аркони давлатдории миллӣ нақши тақдирсозу ҳалкунанда бозид”. 
         Воқеан, қабули ин санади муҳими сиёсӣ аз тариқи раъйпурсии умумихалқӣ дар таърихи 6 ноябри соли 1994 яке аз дастовардҳои бузурги даврони соҳибистиқлолии кишвар мебошад. Ин санади олии сиёсиву ҳуқуқӣ роҳи рушди минбаъдаи давлати соҳибистиқлоли тоҷиконро барои садсолаҳо муайян кард. 
         Дар Конситутсияи Тоҷикистон арзишҳои олии миллии мо, сохторҳои давлат, волоияти қонун ва ҳуқуқу озодиҳои инсон, яъне ҳақ доштан ба зиндагии озод, гиромидошти қадру номуси шаҳрванд ҳамчун арзиши олии давлатдорӣ эътироф ва муайян карда шудаанд.
         Мардуми Тоҷикистон бо қабули ин санади олии сиёсиву ҳуқуқӣ ба ҷомеаи ҷаҳонӣ эълом кард, ки соҳиби давлати демократӣ, ҳуқуқбунёд, дунявӣ ва ягона асту арзишҳои миллии худро гиромӣ медорад, тамомияти арзии худро эътироф менамояд, ҷонибдори ҷомеаи адолатпарвар аст ва бо ҷомеаи ҷаҳонӣ дар асоси эҳтироми баробарҳуқуқӣ ва таҳкими дӯстиву бародарӣ муносибат мекунад.
  Бовар дорам, ки мардуми сарбаланди шаҳри бостонии Панҷакент ҳамеша бо эҳтиром гузоштан ба ин санади олии ҳуқуқӣ ва риояи дақиқи меъёрҳои он вазифаи шаҳрвандии худро сарбаландона иҷро хоҳанд кард, зеро гиромӣ доштани муқаррароти  Конститутсия кафили таъмини қонуният, пирӯзии адолату амният ва сулҳу суботи сиёсӣ дар ҷомеа мебошад. 
           Бо ҳамин орзуву ният санаи фархундаи 31-умин солгарди қабули Конститутсияи Ҷумҳурии Тоҷикистонро  бори дигар шодбош гуфта, бо боварӣ изҳор медорам, ки  ҳамдиёронии арҷмандамон дар партави нишондодҳои Конститутсия, дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷашни фархундаи 35-солагии Истиқлоли давлатии Ҷумҳурии Тоҷикистонро бо корҳои ободониву созандагӣ ва дастовардҳои назаррас дар тамоми соҳаҳо истиқбол мегиранд.

         Рӯзи Конститутсияи Ҷумҳурии Тоҷикистон муборак бод!

2025-10-31 13:20:51

БОЗДИД АЗ ДИДБОНГОҲИ САРҲАДӢ

Мақомоти иҷроияи маҳаллии ҳокимияти давлатии шаҳри Панҷакент бо қисмҳои низомии мустақар дар ҳуҳуди шаҳр робита ҳамкориҳои судмандро ба роҳ мондааст.

  Зимни сафари корӣ ба деҳоти Амондара раиси шаҳр  Абдухолиқ Холиқзода аз дидбонгоҳи сарҳадии “Ёрӣ-2”-и  Қӯшунҳои сарҳадии Кумитаи давлатии амнияти миллӣ дидан намуд.

  Дар ин воҳиди низомӣ барои хидмати шоистаи афсарону сарбозон ҳамаи шароит тибқи оинномаҳои ҳарбӣ муҳайё карда шудааст. Ҳайати шахсии дидбонгоҳ бо хобгоҳи муҷаҳҳаз, хурокҳои серғизо, яроқу аслиҳа, майдони машқу тамрин таъмин буда, сарҳади давлатии кишварро содиқона ҳифз менамоянд.

  Дар сӯҳбат сарбозон даъват шуданд, ки хидмати Ватанро софдилона ва содиқона баҷо оварда, дар роҳи ҳифзи марзу буми кишвар ҷасорату мардонагӣ нишон диҳанд.

2025-10-31 12:48:06

СЕЛРОҲАҲО ТОЗА КАРДА МЕШАВАНД

Бо дастгирии мақомоти иҷроияи маҳаллии ҳокимияти давлатии шаҳри Панҷакент барои тоза кардани сою селроҳаҳои ҳудуди шаҳр бо мақсади пешгирии хатарҳои эҳтимолӣ тадбирҳои амалӣ андешида мешавад.

  Аз ҷумла, сойи селрави  деҳаи Амондара, ки  собиқа ба асари боришот   бо қуму санг  пур шуда буд, бо ҷалби  техникаҳои зарурӣ таҳти назорати шуъбаи шаҳрии Раёсати Кумитаи ҳолатҳои фавқуллода ва мудофиаи гражданӣ дар вилояти Суғд  тоза карда мешавад.

  Зимни боздиди раиси шаҳр Абдухолиқ Холиқзода аз рафти  ин корҳо гуфта шуд, ки дар ҳудуди шаҳр 87  минтақаи хавфнок ба масофаи беш аз 50 километр  мавҷуд буда, онҳо марҳила ба марҳила тоза карда, хатари зиёни боришот ва сел  ба заминҳои кишт, маҳалҳои аҳолинишин ва  роҳу пулҳо коҳиш дода мешавад.

2025-10-31 12:28:45

480 НАФАР ҶАВОНОНИ ШАҲРИ ПАНҶАКЕНТ БА ХИЗМАТИ ҲАРБӢ РАФТАНД ВА НАҚШАИ ДАЪВАТИ ТИРАМОҲӢ ПЕШ АЗ МӮҲЛАТ ИҶРО ШУД...

Фармони Президенти Ҷумҳурии Тоҷикистон аз 29 августи соли 2025, №1070 “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007-и Ҷумҳурии Тоҷикистон ба хизмати ҳарбӣ” дар шаҳри Панҷакент пеш аз мӯҳлати муқарраршуда ба иҷро расонида шуд.

Бо роҳандозии корҳои тарғиботӣ ва ташкилию сафарбарӣ аз ҷониби мақомоти иҷроияи маҳаллии ҳокимияти давлатии шаҳр дар ҳамкорӣ бо комиссияи шаҳрии  даъват, мақомоти ҳифзи ҳуқуқ, комиссариати ҳарбии шаҳр, ҷамоатҳои деҳот 480 нафар ҷавонон ба хидмати ҳарбӣ сафарбар карда шуданд.

Ҷолиби қайд аст, ки  қисми зиёди даъватшавандагон бо хоҳиши худ хидмат ба  Модар – Ватанро ихтиёр намуданд.

2025-10-31 10:19:19

БОЗДИД АЗ РАФТИ БУНЁД ВА ФАЪОЛИЯТИ ИНШООТИ ИҶТИМОӢ

Дар  нақшаи омодагиҳо ба ҷашни 35- солагии истиқлоли давлатии Ҷумҳурии Тоҷикистон дар шаҳри Панҷакент бунёду азнавсозии иншооти соҳаҳои иҷтимоӣ, аз ҷумла муассисаҳои таълимӣ ва тандурустӣ, ҷойгоҳи хоса додад ва то ин муддати соли равон беш аз 160 адад иншооти таъиноти иҷтимоӣ мавриди истифода қарор дода шудааст.

  Раиси шаҳр Абдухолиқ Холиқзода дар ҷараёни сафари корӣ ба деҳоти Амондара бо рафти бунёди бинои нави муассисаи таҳсилоти миёнаи умумии № 19-и деҳаи Майката шинос шуда, ба паймонкор ҷиҳати тезонидани суръати сохтмон ва дар муҳлати  пешбинишуда ба анҷом додани он   дастур дода шуд.

  Дар идомаи  боздид  дар деҳаи Сафобахш иқдоми сокинон барои ба кӯдакистон табдил додани  собиқ бинои ҷамъиятӣ мақбул дониста, барои тибқи меъёрҳои барои  кӯдакистон муқарраршуда ба роҳ мондани  таҷдиди  он   маслиҳат дода шуд.

 Дар рафти боздид  дар деҳаи Хӯҷағариб  ташаббуси сокинон барои бунёди бинои нави муассисаи таҳсилоти миёнаи умумии № 100 ҷонибдорӣ карда, мавзеъи сохтмони он муайян карда шуд. Ҳамчунин дар рафти боздид аз фаъолияти бунгоҳи тиббии деҳа ба соҳибкорону сокинон барои таъмиру таҷдиди бинои он маслиҳату дастур дода шуд.

2025-10-31 08:42:08

САФАРИ КОРӢ БА ДЕҲОТИ АМОНДАРА ВА БА ИСТИФОДА ДОДАНИ ХАТИ ОБ ВА ПУЛ

Мушкилоти бо оби  нӯшокӣ ва  полезӣ таъмин намудани сокинон ва заминҳои кишти деҳаи Хӯҷағариби деҳоти Амондара   бо  бунёди пойгоҳи обкашӣ ва кашидани хати об  баъди солҳои тӯлонӣ ҳал шуд.Дар ҷараёни сафари кории раиси шаҳр Абдухолиқ Холиқзода  ба ҷамоати деҳот  ин хати об  дар масофаи  беш аз шаш километр мавриди истифода қарор дода шуд.

  Тавре иттилоъ дода шуд, бунёди он  бо дастгирии мақомоти иҷроияи маҳаллии ҳокимияти давлатии шаҳр, саҳмгузории соҳибкорони бурунмарзӣ ва сокинон соли гузашта оғоз  ёфта буд. 

   Дар ин муддат бо харҷи  наздик ба ду  миллион сомонӣ дар соҳили дарёи Зарафшон чоҳи амудӣ канда,  аз он ҷо тавассути пойгоҳи обкашӣ  ва лӯлаҳо  ба ҳавзи болопӯшида об оварда, пасон дар навбати дуюм бо насби таҷҳизоти обкашӣ аз он  то ба деҳа  хати об кашида шуд.

    Аз тариқи он на танҳо сокинони деҳа бо оби тозаи нӯшокӣ таъмин мешаванд, балки дар   даҳҳо гектар заминҳои асрҳо лалмӣ  зироат кишт карда, боғу токзор бунёд карда хоҳад шуд.

   Зимни сафари корӣ ҳамчунин  дар ин деҳа пули мошингузар, ки бо маблағгузории соҳибкор  Бахтиёр Воҳидов сохта шудааст,мавриди истифода қарор дода шуд. 

  Дар сӯҳбат бо сокинони деҳа ин иқдоми  онҳо  шоиста  ва дастовези арзанда ба 35- солагии истиқлоли давлатии Ҷумҳурии Тоҷикистон арзёбӣ карда шуд.

2025-10-28 14:16:31

БА НЕКОН БОШУ АНДАР НЕКУӢ КӮШ

Дар мақомоти иҷроияи маҳаллии  ҳокимияти давлатии шаҳри Панҷакент дар заминаи дастуру ҳидоятҳои  Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  барои дастгирии табақаҳои эҳтиёҷманди аҳолӣ, маъюбон, шахсони имкониятиашон маҳдуд тадбирҳои амалӣ андешида, аз ҷумла, дар сафарҳои кории роҳбарияти шаҳрдорӣ ба маҳалҳо   онҳо аёдат карда, кӯмаки пулию молӣ расонида мешавад.    

   Сокини шаҳри Панҷакент Тоҷинисо Мустафоева шояд аз камшумор бонувоне ҳаст, ки бо вуҷуди маъюбияти модарзодӣ, нокороии дастон  бо пояш   ҷуроб мебофад, кашида ва сӯзанидӯзӣ мекунад.

  Раиси шаҳр Абдухолиқ Холиқзода зимни аёдат ба ӯ барои ин таҳаммулу матонат, иродаи қавӣ, ки на ҳар шахси  ҷисман солим доро аст, изҳори сипос намуд. Таъкид шуд, ки мақомоти иҷроияи маҳаллии  ҳокимияти давлатии шаҳр  ӯро  ҳамаҷониба дастгирӣ мекунад.  Аз ҷумла, хонае, ки ҳоло ӯ  истиқомат мекунад, чанд сол қабл  ройгон ба ӯ дода шуда буд.

  Дар сафари корӣ ба  деҳоти Хурмӣ дар деҳаи Озодагон раиси шаҳр   Шаҳриёр Нурбоев, маъюби гурӯҳи якум ва ва се нафар хоҳару ҷиянҳои ӯро, ки маъюби модарзод  ҳастанд, аёдат намуд.

  Гуфта шуд, ки ин оила зери назорати  табибон қарор дошта,  онҳо аз кӯмаки мақомоти шаҳрдорӣ, ҷамоати деҳот ва шахсони хайрхоҳ бархурдоранд. Аз ҷумла, ба яке аз духтаракони маъюби ин оила, ки дастонаш корӣ ҳастанд, мошинаи дарздӯзӣ  тақдим карда шудааст.

   Хонаи сокини деҳаи Турки Роҷи деҳоти Амондара Аҳмад Маҷидзода-  афсари нерӯҳои сарҳадӣ, ки   дар ҳифзи сарҳад ҷароҳат бардошта, маъюб шудааст, бо дастгирии мақомоти иҷроияи маҳаллии ҳокимияти давлатии шаҳр ва шахсони  хайрхоҳхоҳ таъмир шуда,  ӯ  бо аробачаи маъюбӣ таъмин карда, пайваста ёрии моддӣ расонида мешавад.

  Зимни аёдат раиси шаҳр ҳангоми сафари корӣ ба деҳоти Амондара ӯ барои ин  дастгириҳо изҳори сипос намуд.

      Аёдату кӯмакба чунин ашхос дар мақомоти иҷроияи маҳаллии ҳокимияти давлатии шаҳр ба ҳукми анъана даромадааст.

2025-10-28 12:56:32

САРФА АЗ АНБОРИ ПУР

 Сокини деҳаи Озодагони деҳоти Хурмии шаҳри Панҷакент Абдунозир Турсунов  барои таъмини маводи хурокаи оилааш ба бозор  кам эҳтиёҷ дорад.

  Ӯ ҳамроҳи ҳамсар ва фарзандонаш  барои давраи зимистон аз замини наздиҳавлигӣ ва саҳмашон, шолӣ, картошка,  помидору бодиринг, каду ва дигар  сабзавот рӯёнида, захира кардаанд.

  Тавре зимни боздиди раиси шаҳр Абдухолиқ Холиқзода аз захираи маводи хурокаи оилааш иброз дошт, қисми  изофаи маҳсулоти ғизоии захиракардаашро, аз ҷумла биринҷро  ба бозор низ   мебарорад.

  Гуфта шуд, ки дар аксари оилаҳои деҳа соҳибхоназанон аз маҳсулоти рӯёнидаашон дар шакли консерва ва дар  анборҳо захира  кардаанд.

  Дар ин сафари корӣ ҳамчунин аз гармхонаи  соҳибкор, сокини деҳаи Озодагон  Далер Турсунов дидан намуда,  аз ин иқдоми ӯ изҳори қаноатмандӣ карда шуд.

  Ӯ дар замини наздиҳавлигиаш дар масоҳати 18 ба 6 метр бо дастгирии шарикони рушд гармхона сохта, дар он бодирингу помидор истеҳсол мекунад.

  Дар замин наздиҳавлигиаш  ҳоло ҳосили қаланфури булғорӣ, сабзӣ ва карам аз кишти такрорӣ барои ҷамъоварӣ омода аст.

  Аз ин маҳсулотҳо ӯ барои давраи зимистон захира карда, ба бозор низ бароварда,  аз фурӯши онҳо эҳтиёҷи оилаашро таъмин мекунад.

2025-10-28 09:38:31

БОЗДИД АЗ КОРГОҲҲОИ ХУРДИ ИСТЕҲСОЛӢ ДАР ДЕҲОТИ ХУРМӢ..

Маҳсули дасти устоҳои сандуқсози деҳаи Озодагони деҳоти Хурмӣ як ҷузъи муҳими ҷиҳози арӯсон дар шаҳру деҳоти Панҷакент аст. 

  Яке аз ин устоҳои сандуқсоз Сомон Фаттоҳов аст, ки раиси шаҳр Абдухолиқ Холиқзода зимни сафари корӣ ба деҳоти Хурмӣ бо фаъолияти ӯ шинос шуда, ба он баҳои баланд дода шуд. Сандуқҳои сохтаи  ӯ бо тарҳу намуди зебо ва кандакорӣ дар бозор талабгорони зиёд доранд.

  Гуфта шуд, ки устоҳои  Озодагон дар шаҳри Душанбе низ устохонаҳои сандуқсозӣ  кушодаанд.

  Дар ин сафари корӣ ҳамчунин бо  фаъолияти  коргоҳи хурди коркарди шолии соҳибкор Абдурасул Хуҷаев, ки чанд сол қабл дар ҳамкорӣ бо шарикони рушд бунёд шуда буд, боздид  карда шуд. Он бо таҷҳизоти ҳозиразамон муҷаҳҳаз буда, дар як баст то як тонна шолиро тоза мекунад.

  Дар ҷараёни боздид ҳамчунин бо рафти сохтмони  маркази савдо ва хидматрсонии  соҳибкор Ҳасанбой Шодиев дар деҳаи Сарикамар, мавзеъе, ки барои бунёди кӯдакистон дар  дар деҳаи Озодагон ҷудо шудааст дидан карда, барои  дар мӯҳлати кӯтоҳ анҷом додани сохтмон ва оғози бунёди кӯдакистон ба масъулон дастур дода шуд.

  Дар маҷмӯъ дар деҳоти Хурмӣ ба  муносибати 35- солагии истиқлоли давлатии Ҷумҳурии Тоҷикистон бунёди 35 иншооти таъиноти гуногун ба нақша гирифта, то ин муддати соли равон 29 иншоот мавриди истифода қарор дода шудааст.

2025-10-27 17:10:24

БОЗДИД АЗ ФЕРМАИ БЕДОНА ВА ЧОРВОИ КАЛОН

Оё аз парвариши бедона ва  фурӯши гӯшту тухми он даромади хуб гирифта мешавад? Ба ин савол раиси хоҷагии деҳқонии  ба номи Бобоқулови деҳаи Ваҳдати  деҳоти Хурмии шаҳри Панҷакент Абдураззоқ Соатов бо боварӣ ҷавоби мусбат медиҳад ва онро кори фоидаовар меҳисобад.

   Тавре зимни боздиди раиси шаҳр Абдухолиқ Холиқзода аз фермаи хурди парвариши бедона ва мурғи хоҷагии деҳқонӣ  иттилоъ дода шуд,  ӯ ин корро як сол қабл шурӯъ карда буд ва  ҳоло  ин  ҷо 830 сар бедона, 50 сар се  зоти мурғ парварш карда мешавад. 

  Гӯшт ва тухми бедона маҳсулоти парҳезии  серғизо маҳсуб шуда, он бо фармоиши мизоҷон ба фурӯш бароварда мешавад.

  Дар хоҷагии деҳқонӣ  ҳамчунин 20 сар гов, 50 сар гӯсфанд ва 40 сар буз низ парвариш карда, хуроки онҳо қисман аз 67 гектар замини обӣ ва 200 гектар чарогоҳи хоҷагии деҳқонӣ истеҳсол карда мешавад.

  Ба сарвари хоҷагии деҳқонӣ барои зиёд намудани саршумори бедона , мурғ ва дигар намуди чорво дастур дода шуд. 

  Дар ин сафари корӣ ҳамчунин  бо фаъолияти фермаи хурди молдории сокини деҳаи Хуррамобод  Зафар Забуров, ки 10 сар чорвои зотӣ  ва  50 сар  гӯсфанди зоти ҳисорӣ парвариш карда мешавад, шинос шуда , барои зҳиёд намудани саршумори онҳо маслиҳат дода шуд.

2025-10-27 17:08:23

САФАРИ КОРӢ БА ДЕҲОТИ ХУРМӢ ВА БОЗДИД АЗ РАФТИ СОҲИЛБАНДӢ ВА ШУДГОРИ ТИРАМОҲӢ

Ҳоло  аз заминҳои шолизори хоҷагиҳои деҳқонии деҳоти Хурмӣ  ҳосил ғундошта шудааст ва деҳқонон ба шудгори заминҳо машғул ҳастанд.

       Тавре зимни сафари кории раиси шаҳр Абдухолиқ Холиқзода ба деҳоти Хурмӣ ва боздид аз рафти шудгори заминҳо гуфта шуд, соли равон кишоварзони хоҷагиҳои деҳқонии ҳудуди ҷамоати деҳот  дар майдони беш аз панҷсад гектар шолӣ кишта, аз он ҳосили фаровон ба даст оварданд ва ҳоло шудгори заминҳои шолипая идома дорад.

        Дар идомаи сафари корӣ бо рафти соҳилмустаҳкамкунии дарёи Зарафшон, ки заминҳои шоликории хоҷагиҳои деҳқонӣ асосан дар  он ҷо воқеъ аст, ба масъулони ҷамоати деҳот,  раисони хоҷагиҳои деҳқонӣ,  соҳибкороне, ки ин ҷо замин кушодаанд, хоҷагии ҷангали шаҳр дастур дода шуд, ки корҳои соҳилбандиро  аз ҳоло, ки дарё камоб аст, вусъат диҳанд.

          Дар идомаи боздид аз нашъунамо  ва рафти парвариши дарахтони павловния дар қитъаи таҷрибавии хоҷагии ҷангал, ки  дар ҳамкорӣ бо шарикони рушд бунёд шудааст, шинос шуда,  барои зиёд намудани ин навъи дарахтони зудрас дар дигар қитъаҳои хоҷагии ҷангал  дастур дода шуд.

2025-10-27 14:31:15

РӮЗИ КОРМАНДОНИ МАҚОМОТИ СУДӢ

Ҳамасола  санаи  26 октябр дар мамлакат Рӯзи кормандони мақомоти судӣ чун яке аз  шохаҳои  муҳими ҳокимияти давлатӣ таҷлил карда мешавад.

   Раиси шаҳри Панҷакент Абдухолиқ Холиқзода кормандони  суди шарҳро ба муносибати иди касбиашон тарик гуфт. 

         Таъкид шуд, ки Конститутсияи  Ҷумҳурии Тоҷикистон амалӣ гардидани ҳокимияти давлатиро дар асоси таҷзияи он ба ҳокимияти қонунгузор, иҷроия ва судӣ пешбинӣ намудааст ва дар ин росто  нақш ва мавқеи ҳокимияти судӣ дар таъмини адолати иҷтимоӣ, таҳкими қонуният ва тартиботи ҳуқуқӣ, дар маҷмӯъ, бунёди ҷомеаи адолатпарвар, демокративу ҳуқуқбунёд ва дунявию иҷтимоӣ  муҳим мебошад.

   Гуфта шуд, ки  бо татбиқи сиёсати созандаву инсонпарваронаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар  кишвари  мо адолати судӣ ва иҷтимоӣ таъмин гардидааст.

  Ба кормандони суди шаҳрӣ   тӯҳфаҳои идонаи мақомоти иҷроияи маҳаллии ҳокимияти давлатии шаҳр тақдим карда шуд.

  Кормандони суди шаҳриро ба муносибати иди касбиашон роҳбарони мақомоти ҳифзи ҳуқуқи шаҳр низ муборакбод гуфтанд.