Panjakent.tj - Хабарҳо

2025-04-22 08:57:38

ДАСТХАТҲОИ ҚАЛЪАИ КӮҲИ МУҒ БА РӮЙХАТИ “ ҲОФИЗАИ ҶАҲОНӢ”-И ЮНЕСКО ШОМИЛ ШУД

Дастхатҳои Қалъаи Муғ, ки ба шарофати бозёфти он дар соли 1932 ба саҳифаҳои таърихи  водии Зарафшон, охирин шоҳи Панҷакенти   давраи истилои арабҳо- Деваштич, кашфиёт ва таҳқиқи минбаъдаи ёдгориҳои асрмиёнагии барвақтии водӣ , шаҳрдориву хоҷагидорӣ, расму русуми оиладорӣ, савдои дохилӣ, вазъи сиёсиву иҷтимоӣ,  барқарор  намудани таърихи сиёсии Осиёи Марказии он  давра  ибтидо гузошт,  дар қатори 74 чунин дастхату ҳуҷҷатҳои нодири ҷаҳон ба Рӯйхати “Ҳофизаи ҷаҳонӣ”-и созмони ЮНЕСКО шомил гардид.

  Зимнан,  тавре шарқшиноси рус, яке аз  муҳаққиқони матнҳои суғдӣ Олга Ивановна Смирнова навиштааст, бори аввал номи Панҷакент дар дастхатҳои суғдии аз Кӯҳи Муғ ёфтшуда, ки мутааллиқи чоряки аввали асри 8 ҳастанд,  сабт шудааст ва он ибтидои кашф ва таҳқиқи   шаҳри Панҷакенти қадим гардид.

 Дастхатҳои Қалъаи Муғ  бо пешниҳоди  Пажӯҳишгоҳи таҳқиқи Осиёи Марказӣ ва Маркази ҷаҳонии мероси хатӣ, ки аз ниҳодҳои созмони ЮНЕСКО ҳастанд , ба ин рӯйхат шомил карда шудааст.  

       Дар ин бораи сомонаи ЮНЕСКО 17 апрели соли 2025 хабар интишор намудааст.

2025-04-18 17:03:41

ҶАЛАСАИ ШӮРОИ ҲАВЗАИ ДАРЁИ ЗАРАФШОН

Дар шаҳри Панҷакент бо иштироки   намояндагони Вазорати энергетика ва захираҳои оби Ҷумҳурӣ,  мақомоти иҷроияи маҳаллии ҳокимияти давлатии шаҳри Панҷакент, навоҳии Айнӣ ва Кӯҳистони Мастчоҳ, масъулони Лоиҳаи “Рушди  фарогири  деҳот. Дастгирии рушди иқтисодии деҳот бо мақсади таъмини даромаднокии аҳолӣ” ( TRIGGER), ки бо дастгирии молиявии шарикони рушд татбиқ мешавад  ва дигар ташкилоту муассисаҳои манфиатдор  ҷаласаи ҳафтуми  Шӯрои ҳавзаи дарёи Зарафшон баргузор шуд. 

  Дар ҷаласа зимни гузоришҳо таъкид шуд, ки дар доираи ин лоиҳа  дар навоҳии ҳавзаи дарёи Зарафшон  зерлоиҳаҳое амалӣ карда мешаванд, ки  ба иҷрои ҳадафҳои Стратегияи миллии рушди Ҷумҳурии Тоҷикистон то соли 2030  ва Барномаи ислоҳоти оби Тоҷикистон барои солҳои 2016-2025  мусоидат менамоянд ва  ба ислоҳоти соҳаи об, механизмҳои ҳалли проблемаҳои мавҷудаи марбут ба банақшагирӣ, идораи захираҳои об,  истифода ва беҳтар намудани амнияти обӣ ва устувории минтақаҳои ҳавзаи дарёи Зарафшон ва ба ин васила баланд бардоштани ҳосилнокии  зироат,дастгирии рушди бозор, пешбурди соҳибкорӣ ва баланд бардоштани некуаҳвории  аҳолӣ нигаронида шудаанд.

  Дар  Шӯро  зимни   ҷавоб ба саволҳои иштироккунандагон масъулони Лоиҳа  оид ба масъалаҳои ба як маҷро гирифтани дарёи Зарафшон, пешгирии обшавии пиряхҳои саргаҳи ин дарё, бо оби нӯшокӣ ва полезӣ беҳтар таъмин намудани шаҳри Панҷакент низ  ибрози назар намуда, нақшаҳо барои давраи минбаъдаи татбиқи лоиҳа муайян карда шуданд.

2025-04-17 17:15:01

МУЛОҚОТ БО СОБИҚАДОРИ ХИДМАТИ ДАВЛАТӢ

Абдураҳмон  Абдушаҳидов аз сокинони барӯманди  Ҷамоати деҳоти Ёрӣ аст, ки солиёни зиёд дар вазифаҳои роҳбарӣ, аз ҷумла раиси ҷамоати деҳот, заҳмат кашида,   ба эҳтироми   ҳамдиёрон сазовор гаштааст.

  Муовини аввали раиси вилояти Суғд  Суҳайлӣ Қурбонзода зимни сафари корӣ ба шаҳри Панҷакент  бо дастури муовини аввали  раиси Маҷлиси миллии Маҷлиси Олии Ҷумҳурии Тоҷикистон, раиси вилояти Суғд муҳтарам Раҷаббой Аҳмадзода ҳамроҳи раиси шаҳр Абдухолиқ Холиқзода  бо ин собиқадори барӯманд мулоқот намуда, ба ӯ тӯҳфаҳои  хотиравӣ тақдим намуда, барои хидмати тӯлонӣ  ба нафъи ҷомеа  сипос изҳор карданд.

  Ӯ барои ғамхорӣ ва таваҷҷӯҳ ба собиқадорон ба  Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон миннатдорӣ изҳор намуд.

2025-04-17 16:43:39

БОЗДИД АЗ РАФТИ КИШТИ КАРТОШКА ДАР ҶАМОАТҲОИ ДЕҲОТИ ХАЛИФА ҲАСАН ВА ЁРӢ

Дар хоҷагиҳои деҳқонию инфиродӣ ва шахсии  шаҳри Панҷакент кишти картошка, ки  ин баҳор дар майдони 3900 гектар пешбинӣ шудааст, бо истифода аз рӯзҳои офтобӣ бомаром идома дорад.Дар заминҳои мавзеъи Қаволаи Ҷамоати деҳоти Халифа Ҳасан, ки деҳқонон аввали моҳи март картошкаи барвақтӣ шинонида буданд, он аллакай сабзидааст.

  Зимни сафари корӣ ба шаҳри Панҷакент муовини аввали раиси вилояти Суғд Суҳайлӣ Қурбонзода бо раиси шаҳр Абдухолиқ Холиқзода бо рафти кишти картошка  дар шаҳр, аз ҷумла, хоҷагиҳои деҳқонии Ҷамоатҳои деҳоти Халифа Ҳасан ва Ёрӣ шинос шуданд.

  Иттилоъ дода шуд, ки  ин баҳор дар Ҷамоати деҳоти Халифа Ҳасан дар майдони 505 ва Ёрӣ дар 580 гектар шинонидани картошка пешбинӣ шуда ,то имрӯз кишоварзон мутаносибан дар майдони 167 ва 78 гектар картошка кишт кардаанд ва ин кор ҳамарӯза идома дода мешавад.

  Дар заминҳои  доманфарохи Ҷамоати деҳоти Ёрӣ  бо истифода аз таҷҳизоти картошкашинонӣ киштро идома медиҳанд.  Ин усул имконият медиҳад, ки аз рӯзҳои офтобӣ босамар истифода бурда, домани майдони киштро васеъ намоянд.

  Ба кишоварзон тавсия дода шуд, ки киштро вусъат дода, нақшаи пешбинишударо дар мӯҳлати кӯтоҳ ба иҷро расонанд.

    Дар маҷмӯъ, то ин муддат дар шаҳр дар майдони  беш аз 900 гектар картошка шинонида шудааст.

2025-04-16 17:43:31

ҲАШАРИ НИҲОЛШИНОНӢ ДАР ҲАФТКӮЛ

Бо  мусоидати мақомоти иҷроияи маҳаллии ҳокимияти давлатии шаҳри Панҷакент дар ҳамкорӣ бо шарикони рушд дар доираи марҳалаи дуюми татбиқи  лоиҳаи “Идоракунии ҳамгирои захираҳои табиӣ дар водии Зарафшон барои рушди одилона ва устувор”(INVEST) бо мақсади иҷрои “Барномаи давлатии рушди соҳаи ҷангал дар Ҷумҳурии Тоҷикистон барои солҳои 2022-2026” ва “Барномаи давлатии кабудизоркунӣ дар Ҷумҳурии Тоҷикистон барои давраи  то соли 2040” дар шафати кӯли ҳафтуми  Ҳафткӯл- Ҳазорчашма, бо иштироки раиси шаҳр Абдухолиқ Холиқзода, роҳбарияту масъулони Лоиҳаи мазкур ва кормандони муассисаи давлатии хоҷагии ҷангали шаҳр ва ихтиёриён ҳашари ниҳолшинонӣ баргузор шуд.

  Дар ин рӯз ҳашарчиён  дар майдони  беш аз даҳ гектар 3900 бех ниҳолҳои дарахтони себ, зардолу, чормағз, ки ба иқлими баландкӯҳ мутобиқанд, бо риояи қоидаҳои агротехникӣ ва  зери назари мутахассисон шинониданд.

  Тавре иттилоъ дода шуд, дар марҳилаи дуюми бунёди боғи кӯҳӣ атрофи он панҷарабандӣ шуда, аз ҳоло нашъунамо ва ҳифзи  он зери назорат гирифта шудааст. 

  Зимнан, Ҳафткӯл бо   кӯлҳои зебо ва табиати фусункораш кайҳост  мавриди таваҷҷӯҳи  сайёҳон ва дӯстдорони табиат аз дохил ва хориҷи мамлакат қарор гирифтааст. Имрӯзҳо низ ҳарчанд ҳаво   дар ин минтақа ҳанӯз гарм нест, ҳамарӯза даҳҳо нафар сайёҳон  аз тамошои  манзараҳои афсонавии он лаззат мебаранд, аз ҳавои тоза нафас мекашанд. Бо оғози масими сайёҳӣ шумораи  сайёҳон бамаротиб меафзояд ва онҳоро дар  пойгоҳи сайёҳии “Ҳафткӯл”, дигар  пойгоҳҳои сайёҳӣ, меҳмонхонаю истироҳатгоҳҳои сарироҳӣ,ки бо дастгирии мақомоти иҷроияи маҳаллии ҳокимияти давлатии шаҳри Панҷакент ташкил шудаанд,  пазироӣ менамоянд. 

  Баъди муддате сайёҳону меҳмонон аз тамошо ва меваҳои ин боғи навбунёди  баландкӯҳ  лаззат мебаранд ва он  зебогиҳои ин мавъеъи сайёҳиро меафзояд.

2025-04-16 16:37:36

БАРРАСИИ НАТИҶАҲОИ РУШДИ ИҚТИСОДИВУ ИҶТИМОИИ ШАҲРИ ПАНҶАКЕНТ ДАР СЕ МОҲИ АВВАЛИ СОЛИ 2025

16 апрели соли равон  бо мақсади баррасии рафти иҷрои  дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, ки дар Паём ба Маҷлиси Олӣ, суханронҳо зимни сафари корӣ ба вилояти Суғд, иҷлосияи якум, даъвати ҳафтуми Маҷлиси Олӣ баён  шудаанд ва   тибқи нақша- чорабиниҳои  мақомоти иҷроияи ҳокимияти давлатии  валояти Суғд  таҳти раёсати раиси шаҳри  Панҷакент  Абдухолиқ Холиқзода  дар маҷлиси фаъолони шаҳр натиҷаҳои рушди иқтисодиву иҷтимоии шаҳр  дар се моҳи аввали соли 2025  мавриди баррасӣ қарор  дода шуд.

 Дар  ҷаласа муовини  авали раиси вилояти Суғд  Суҳайлӣ Қурбонзода, муовинони раиси шаҳр, роҳбарони мақомоти ҳифзи ҳуқуқ, воҳидҳои сохтори мақомоти иҷроияи маҳаллии ҳокимияти давлатии шаҳр, ташкилоту муассисаҳо, раисони ҷамоатҳои деҳот, маҳаллаҳои шаҳр  ва дигар шахсони масъул ширкат варзиданд. 

   Дар ҳисобот оид ба натиҷаҳои рушди иқтисодиву иҷтимоии шаҳри Панҷакент дар се моҳи аввали соли 2025, ки  аз ҷониби муовини раиси шаҳр  Парвина Нақибӣ ироа гардид,  натиҷаҳои фаъолияти ҳамаи соҳаҳои иқтисоду иҷтимоиёти шаҳр, аз ҷумла,  нақшаҳои воридоти маблағ ба буҷет, нишондиҳандаҳо дар соҳаҳои саноат, кишоварзӣ, маориф, тандурустӣ, фарҳанг, кор бо занону ҷавонон ва варзиш, рафти иҷрои нақшаи омодагиҳо ба 35- солагии истиқлоли давлатии Ҷумҳурии Тоҷикистон ва дигар соҳаҳо таҳлил карда шуд.

 Дар ҷаласа зимни пурсиш аз муовинони раиси шаҳр, роҳбарони  шуъбаю бахшҳои мақомоти иҷроияи маҳаллии ҳокимияти давлатии шаҳр, раисони ҷамоатҳои деҳот таваҷҷӯи онҳо ба таъмини рушди босуботи соҳаҳо,  иҷрои нақшаҳои пешбинишуда, вусъати  кишту кори баҳорӣ, корҳои ободонӣ, бартараф намудани камбудиҳои мавҷуда ҷалб карда шуд

 Муовини  аввали раиси вилояти Суғд  Суҳайлӣ Қурбонзода дар  ҷаласа сухан гуфта, оид ба  иҷрои нақшаю барномаҳои давлатӣ, истифодаи самараноку оқилонаи замин, вусъати кишти баҳорӣ, корҳои созандагию бунёдкорӣ бахшида ба ҷашни 35-солагии истиқлоли давлатии Ҷумҳурии Тоҷикистон  мулоҳизаҳояшро баён намуд.

   Дар ҷамъбасти  ҷаласа  раиси шаҳр Абдухолиқ Холиқзода вобаста ба нишондиҳандаҳо дар соҳаҳои иқтисодӣ ва иҷтимоӣ дар семоҳаи аввали соли равон дар назди масъулони соҳаҳо ва роҳбарони ташкилоту муассисаҳо оид ба таъмини рушди босубот ва иҷрои нақшаҳои пешбинишуда вазифагузорӣ намуд.

2025-04-16 07:38:58

ПАНҶАКЕНТ: НАҚШАИ ДАЪВАТИ ҶАВОНОН БА ХИДМАТИ ҲАРБӢ ПЕШ АЗ МӮҲЛАТ ИҶРО КАРДА ШУД

Имрӯз гурӯҳи навбатии ҷавонони шаҳри Панҷакент ба хидмати ҳарбӣ гусел карда шуданд ва бо ин Фармони Президенти Ҷумҳурии Тоҷикистон,Сарфармондеҳи Олии Қувваҳои Мусаллаҳи Ҷумҳурии Тоҷикистон,муҳтарам Эмомалӣ Раҳмон  аз 19 феврали соли 2025,,таҳти рақами 967 "Дар бораи ба эҳтиёт рухсат додани хизматчиёни ҳарбие,ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони соли таваллуди 1998-2007 ба сафи Қувваҳои Мусаллаҳи Ҷумҳурии Тоҷикистон ба хизмати ҳарбӣ" пеш аз мӯҳлат ба иҷро расонида шуд.

Дар иҷрои пеш аз мӯҳлати нақшаи даъвати баҳорӣ роҳандозии ҳамкории густурдаи мақомоти иҷроияи маҳаллии ҳокимияти давлатии шаҳр, комиссияи шаҳрии даъват, мақомоти сохторҳои ҳифзи ҳуқуқ, ҷамоатҳои деҳот, маҳаллаҳои шаҳр бо ҷавонону волидайни онҳо ва бо амри дил хидмати Ватанро ихтиёр намудани даҳҳо нафар ҷавонони баору ватандӯст мусоидат намуд.

Дар даъвати баҳории  хидмати ҳарбӣ 390 нафар ҷавонони ғаюр ва ватандӯсти шаҳри Панҷакент  ба хидмати Модар-Ватан сафарбар карда шуданд.

2025-04-15 15:28:06

САФАРИ КОРӢ БА ҶАМОАТИ ДЕҲОТИ ХУРМӢ

Дар ҷамоати деҳоти Хурмии шаҳри Панҷакент дар доираи нақшаи омодагиҳо ба ҷашни 35- солагии истиқлоли давлатии Ҷумҳурии Тоҷикистон бунёди як қатор иншооти таъиноти иҷтимоӣ идома дорад ва кишоварзон кишти зироатҳои баҳорӣ, аз ҷумла картошкаро вусъат медиҳанд.

  Зимни сафари корӣ ба Ҷамоати деҳот  ва иштирок дар ҳашари картошкашинонӣ дар хоҷагии деҳқонии “Чубот” ба раиси шаҳр Абдухолиқ Холиқзода  иттилоъ дода шуд, ки  баҳори ҷорӣ дар хоҷагиҳои деҳқонӣ ва инфиродӣ  дар майдони 70 гектар картошка кишт менамоянд ва то имрӯз дар ин хоҷагӣ дар 7 ва дар маҷмӯъ дар  35 гектар кишт гузаронида шудааст.

  Ба  роҳбарияти Ҷамоати деҳот, хоҷагиҳои кишоварзӣ ҷиҳати вусъат бахшидани кишти картошка ва омодагӣ ба кишти дигар навъҳои сабзавот ва шолӣ дастур дода шуд.

  Дар ҷараёни сафари корӣ  раиси шаҳр ҳамчунин аз рафти бунёди коргоҳи хишт, маркази дандонпизишкӣ ва дорухона дар деҳаи  Сари камар шинос шуда,  соҳибмулкон  барои дар мӯҳлати пешбинишуда ба истифода додани онҳо муваззаф карда шуданд.

2025-04-15 15:25:55

ТАВСЕАИ ҲАМКОРӢ БО ШАРИКОНИ РУШД ДАР ТАТБИҚИ ЛОИҲАҲО

Масъалаҳои  тавсеаи ҳамкории мақомоти иҷроияи маҳаллии ҳокимияти давлатии шаҳри Панҷакент дар татбиқи  марҳалаи дуюми лоиҳаи  “Идоракунии ҳамгирои захираҳои табиӣ дар водии Зарафшон барои рушди одилона ва устувор”(INVEST), ки дар ҳамкорӣ бо шарикони рушд амалӣ карда мешавад, дар мулоқоти раиси шаҳр Абдухолиқ Холиқзода бо роҳбари Лоиҳаи мазкур Зумрат Норматова мавриди баррасӣ қарор гирифт.

  Зимни  муҳокима масъалаҳои рафти  татбиқи  зерлоиҳаҳои татбиқшаванда ва пешбинишуда дар самтҳои  таъминот бо оби нӯшокӣ ва полезӣ,  фаъолияти шабакаҳо обрасонӣ, вусъат бахшидан ба татбиқи онҳо  ва дигар зерлоиҳаҳо  матраҳ карда шуданд.

2025-04-15 11:53:28

ИДОМАИ БАРТАРАФ НАМУДАНИ ОҚИБАТИ ЯРЧ ДАР КАНАЛИ МАРҒЕДАР

Бо дастгирии мақомоти иҷроияи маҳаллии ҳокимияти давлатии шаҳри Панҷакент, саҳмгузории  ассосиатсияҳои истифодабарандагони оби полезӣ   бартараф намудани оқибати ярч дар канали Марғедар, ки тавассути он беш аз 5 ҳазор гектар замини кишт ва боғоти  ҳудуди чор ҷамоати деҳот обёрӣ карда мешавад, идома дорад.

  Тавре зимни боздиди раиси шаҳр Абдухолиқ Холиқзода  аз рафти бартараф намудани оқибати офати табиӣ гуфта шуд, ҳоло гирифтани хоки теппаҳои соҳили чапи  канал, ки эҳтимоли ярч ва банд кардани маҷрои об дар онҳо зиёд аст, бо ҷалби техникаю механизмҳои зарурӣ идома дорад.

   Роҳбарияти идораи давлатии беҳдошти замин ва обёрии ҳавзаи дарёи Зарафшон ва дигар масъулон муваззаф карда шуданд, ки кори бартараф намудани оқибати ярч ва омода намудани ин иншооти муҳими обёриро ба бастани об шабонарӯзӣ идома дода, онро дар мӯҳлати кӯтоҳ ба анҷом расонанд.

  Рафти корҳо  ҷиҳати  бартараф намудани оқибати ин офати табиӣ зери назорат ҳамарӯзаи мақомоти иҷроияи маҳаллии ҳокимияти давлатии шаҳр қарор дорад.

2025-04-14 14:03:40

НИҲОЛҲОИ ЗЕБОИ НОДИР ГУЛГАШТҲОИ ШАҲРРО ОРО МЕДИҲАНД

Дирӯз кормандони  дастгоҳи раиси шаҳри Панҷакент бо иштироки раиси шаҳр Абдухолиқ Холиқзода  ба ҳашари ниҳолшинонӣ дар гулгашти  саҳни  бинои мақомоти иҷроияи маҳаллии ҳокимияти давлатӣ баромаданд.Инҷо чандин бех ниҳолҳои нодири ороишӣ  шинонида шуд.

   Зимнан,  бо иқдоми мақомоти иҷроияи маҳаллии ҳокимияти давлатии шаҳр дар ҳамкорӣ бо мақомоти ноҳияи Ҷонбойи вилояти Самарқанди Ҷумҳурии Ӯзбекистон  24 бех  ниҳоли ороишии нодири  нахл,  52 бех бирючина( буттаи ороишӣ), 100 бех   ардач,  52 бех сада,  100 бех санавбари қримӣ, 22 бех  шоҳбулут, 12 бех маҷнунтут ,10 бех коҷ  ва дигар гулу буттаҳои оришӣ дастрас карда шуд.

  Шинонидани  ин ниҳолҳои зебо ва нодири оришӣ  дар хиёбону гулгаштҳои шаҳр идома дорад.

2025-04-10 17:16:28

КӮЧАҲОИ ШАҲРИ ПАНҶАКЕНТ САРСАБЗ МЕШАВАНД

Бо  иқдоми мақомоти иҷроияи маҳаллии ҳокимияти давлатии шаҳри Панҷакент дар канори  шоҳроҳ ва гулгаштҳои  хиёбони  марказии шаҳр  ниҳолҳои ороишии нодир шинонида мешавад.

   Ин ниҳолҳо  аз навъҳои такмилшудаи  нахл, ардач, сада, санавбар , шоҳбулут, коҷ ва  гулу буттаҳои дигари ороишӣ иборат буда, дар ҳамкорӣ бо шарикон аз Ҷумҳурии Ӯзбекистон дастрас карда шудааст ва бо маслиҳату дастури мутахассисон, бо риояи агротехникаи хос барои чунин навъҳо шинонида мешавад.

  Бо сабз шудани ин ниҳолҳо  хиёбони марказии шаҳр, ки номи сардафтари адабиёти классикии тоҷику форс Абӯабдуллоҳ Рӯдакиро дорад, қабои бо ҳам  зебо ба бар хоҳад кард.

2025-04-10 12:34:49

БА КӮДАКОНИ МАЪЮБ АРОБАЧА ТАҚДИМ КАРДА ШУД

Аз ин пас сӣ нафар наврасону кӯдакони маъюби шаҳри Панҷакент, ки аз пои равон маҳруманд, метавонанд, ба сайру гашт бароянд.

Бо дастгирию мусоидати мақомоти иҷроияи маҳаллии ҳокимияти давлатии шаҳри Панҷакент ташкилоти чамьиятии "Нури умед" дар доираи лоиҳаи "Масьулияти бештар, зарфияти беҳтар, дигаргуниҳои амиқтар, дастгирии созмонҳои ҷомеаи шаҳрвандӣ барои рушди ҷомеьаи фарогир дар Тоҷикистон", ки аз чониби Иттиҳоди Аврупо маблаггузорӣ мешавад, ба 30 нафар наврасон ва кӯдакони имконияташон маҳдуди деҳаҳои ҳадафии лоиҳа аробачаҳои маьюбӣ тақдим намуд.

Дар маросими тақдими арабачаҳои маъюбӣ, ки дар тарабхонаи “Диловара”-и шаҳр бо баргузории маҳфили ҷолибе доир шуд, волидони кӯдакони маъюб ва худи онҳо аз ин иқдом изҳори сипос ва қаноатмандӣ намуданд.

2025-04-08 16:37:09

КАНАЛИ ФАРМЕТАН ВА СЕЛРОҲА ТОЗА КАРДА МЕШАВАД

Бо ҷалби техникаи Идораи давлатии беҳдошти замин ва обёрии ҳавзаи дарёи Зарафшон ва  саҳмгузорию иштироки сокинони деҳаи Чорбоғи Ҷамоати деҳоти Косатарош маҷрои канали Фарметан дар ҳудуди деҳа   тоза  ва соҳилҳои  селроҳаи байни деҳа мустаҳкам карда мешавад.

  Дар ҷараёни боздид аз Ҷамоати деҳоти Косатарош  раиси шаҳри Панҷакент Абдухолиқ Холиқзода ин иқдомро муҳим арзёюбӣ намуда, ба масъулон ва ташаббускорон барои дар мӯҳлати кӯтоҳ анҷом додани ин корҳо дастур дода шуд.

2025-04-07 17:38:46

НАХУСТИН БОҒИ ТАМАШК БУНЁД МЕШАВАД

Дар канори токзори навбунёди  хавозавии деҳаи  Ғӯсари Ҷамоати деҳоти Лоиқ Шералӣ бо ибтикори мақомоти иҷроияи маҳаллии ҳокимияти давлатии шаҳри Панҷакент нахустин боғи тамашк( малина) бунёд карда мешавад.

  Дирӯз кишоварзон бо иштироки раиси шаҳр Абдухолиқ Холиқзода ба шинонидани ниҳоли ин меваи буттагӣ  дар 20 ҳисса замин шурӯъ намуданд.

  Гуфта шуд, ки  ниҳоли навъи интенсивии ин мева, ки аз тариқи хавоза парвариш карда мешавад, нисбат ба навъи маъмулӣ зудрас ва серҳосил буда, он дар ҳамкорӣ бо кишоварзони ноҳияи Тайлоқи вилояти Самарқанди Ҷумҳурии Ӯзбекистон дастрас карда шудааст.

  Дар он ҷо аз  ин навъи тамашк ҳосили фаровон мегиранд ва он дар бозор харидорони зиёд дорад. Зимнан, тамашк  ба ҷуз хуштаъм буданаш хосияти давоӣ дошта, барои шамолзанӣ,коҳиши ҳарорати баланд,  хуб намудани кори дилу рагҳо, тоза кардани рагҳои хунгард  истифода мешавад ва аз он шарбату мураббо низ омода менамоянд.

2025-04-07 15:44:20

ДӮСТОН ОИНАИ ЯКДИГАРАНД

Муносибатҳои гуногунҷабҳаи дӯстонаи Ҷумҳуриҳои Тоҷикистон ва Ӯзбекистон ба шарофати сиёсати пешгирифтаи роҳбарони кишварҳо - Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва Президенти Ҷумҳурии Ӯзбекистон , муҳтарам Шавкат Мирзиёев ба сатҳи комилан нав баромада, ҳоло чун намунаи равобити неки ҳамсоягӣ ва ҳалли масоили гуногун дар минтақа ва ҷаҳон баҳогузорӣ карда мешавад.

Инро тантанаҳои наврӯзӣ дар вилояти Суғд бо иштироки роҳбарони олии Тоҷикистон, Ӯзбекистон ва Қирғизистон, мулоқоти сарварони Тоҷикистону Ӯзбекистон дар ҳошияи Ҳамоиши Осиёи Марказӣ ва Иттиҳоди Аврупо дар шаҳри Самарқанд бори дигар собит менамояд.

Дар ин замина раиси шаҳри Панҷакент Абдухолиқ Холиқзода дар раъси як ҳайат ба шумули соҳибкорон, кишоварзон, саноатчиён аз ҳамсояноҳияҳои Тайлоқ, Ургут ва Ҷонбойи вилояти Самарқанди Ҷумҳурии Ӯзбекистон дидан намуда, бо таҷрибаи онҳо дар соҳаҳои гуногун, хоса кишоварзӣ ва саноат, ошно шуданд.

Дар ин сафар ҳайати шаҳри Панҷакентро ҳокими ноҳияи Тайлоқ Баҳодир Облоназаров, Ургут- Ботир Ҷабборов ва Ҷонбой- Хуршед Назаров роҳнамоӣ намуданд.

Зимни боздид аз ин ноҳияҳо ҳайати шаҳри Панҷакент бо таҷрибаи парвариши тамашк, истифодаи замин, бунёди гармхонаҳо, коргоҳҳои истеҳсоли шароб, маҳсулоти ширӣ ва гӯштӣ, боғҳои интенсивии себ, гелос, шафтолу дар майдонҳои васеъ, ки аз тариқи қатрагӣ обу ғизо дода мешаванд, ширкати “Боғбон”, ки ба сабзонидани навъҳои гуногуни интенсивии ниҳоли дарахтони мева ва ток аз ҳуҷайра машғул аст ва минтақаи озоди иқтисолии Ургут, ки соли 2017 дар масоҳати 1842 гектар таъсис ёфта, ҳоло онҷо дар даҳҳо коргоҳҳои истеҳсолӣ беш аз 5000 нафар ба шуғл фаро гирифта шудаанд, шинос гардиданд.

Дар ҷараёни боздид имкониятҳои роҳандозии ҳамкориҳо бо соҳибкорону кишоварзони шаҳри Панҷакент, омӯхтани таҷрибаи пешқадами тарафайн, ташкили корхонаҳои муштарак ва дигар ҷанбаҳои робитаҳои иқтисодӣ баррасӣ шуда, чунин боздидҳо барои густариши минбаъдаи ҳамкориҳои гуногунҷабҳаи иқтисодӣ ва фарҳангӣ муфид арзёбӣ шуд.