Мақомоти иҷроияи маҳаллии ҳокимияти давлатии шаҳри Панҷакент нисбат ба даргузашти писари Шоири Халқии Тоҷикистон, устод Лоиқ Шералӣ- Ромиш Шералӣ, ба пайвандон ва наздиконаш таслият изҳор мекунад.

Хотираи неки Ромиш Шералӣ- ношири муваффақ ва муаррифгари осори устол Лоиқ Шералӣ дар қалби дӯстону наздикон ва ҳамдиёрон боқӣ хозҳад монд.

МАШВАРАТ БО ШАРИКОНИ РУШД

БАРОИ ТАВСЕАИ ҲАМКОРИҲО

Дар мақомоти иҷроияи маҳаллии ҳокимияти давлатии шаҳри Панҷакент дар машварат бо масъулони лоиҳаи Идоракунии ҳамгирои захираҳои табиӣ барои рушди одилона ва устувор дар водии Зарафшон (INVEST), ки бо ҳамкории Ҳукумати мамлакат, Иттиҳодияи Аврупо ва Хазинаи Оғохон дар Тоҷикистон дар шаҳру навоҳии водии Зарафшон амалӣ мешавад, масъалаҳои идома ва роҳу усулҳои минбаъдаи ҳамкорӣ мавриди баррасӣ қарор гирифт.

Аз ҷумла, зимни гузориш масъулони Лоиҳа оид ба татбиқи зерлоиҳаҳо бо мусоидати мақомоти иҷроияи маҳаллии ҳокимияти давлатии шаҳр дар самтҳои кишоварзӣ, обёрӣ, бунёди гармхонаву сардхонаҳо, ҷангал, коркарди маҳсулоти кишоварзӣ, ташкили боғҳои интенсивӣ, таъминот бо тухмии сабзавот, техникаи хурдӣ кишоварзӣ ва нақшаҳо барои соли равон раиси шаҳр Абдухолиқ Холиқзода тавсеаи ҳамкориҳоро дар ин самтҳо дар соли равон ва давраи минбаъдаи татбиқи Лоиҳа муҳим арзёбӣ намуд.

Гуфта шуд,ки мақомоти иҷроияи маҳаллии ҳокимияти давлатии шаҳр барои татбиқи Лоиҳа дар ҷамоатҳои деҳоти ҳадафӣ манфиатдор аст ва дар ин кор мусоидати фаъолонаро роҳандозӣ менамояд.

Табрику таҳнияти модарону бонувон ба муносибати Рӯзи модарон, арҷ гузоштан ба заҳмату нақши носутудании онҳо бо ибтикори Пешвои муаззамии миллат, Президенти Ҷумҳурии Тоҷикистон, муҳтарам Эмомалӣ Раҳмон дар даврони истиқлоли кишвар ба ҳукми анъана даромадааст.

Дар ин росто арафаи Рӯзи модарон раиси шаҳри Панҷакент Абдухолиқ Холиқзода бо чанд нафар бонувони барӯманди шаҳр дидорбинӣ карда, онҳоро бо Рӯзи модарон муборакбод намуд.

Яке аз онҳо омӯзгори собиқадор Ҳалима Саъдуллоева аст, ки беш аз ним аср ба шогирдон асрори фанни биологияро омӯзонида, дар тарбияи онҳо саҳм гузоштааст.

Ҳамроой Эсоева бошад 40 сол дар муассисаи таҳсилоти миёнаи умумии №3-и шаҳр ба хонандагони синфҳои ибтидоӣ хату савод омӯзонидааст ва ҳоло дар иҳотаи фарзандону наберагон давлати пирӣ меронад ва шогирдони зиёдаш ӯро эҳтиром мекунанд.

Басра Миноқулова – собиқадори соҳаи матлубот, солҳои зиёд дар вазифаҳои роҳбарӣ заҳмат кашида, дар беҳдошти соҳа ва тарбияи фарзандони солеҳ саҳми бориз гузоштааст.

Дар сӯҳбат ин бонувони барӯманд аз сиёсати давлат нисбат ба занону модарон изҳори қаноатмандӣ ва шукргузорӣ намуданд.

Ба онҳо тӯҳфаҳои идонаи мақомоти иҷроияи маҳаллии ҳокимияти давлатии шаҳр тақдим карда шуд.

 Дар деҳаи Марғедари Ҷамоати деҳоти Рӯдакии шаҳри Панҷакент бо мусоидати мақомоти иҷроияи маҳалии ҳокимияти давлатии шаҳр ва саҳмгузории соҳибкорон ва ҷавонон ба истиқболи 35-умин солгарди истиқлоли давлатии Ҷумҳурии Тоҷикистон Майдони Парчам ва толори варзишӣ бо номи “Паҳлавонони Суғд” ва варзишгоҳ идома дорад.

Раиси шаҳр Абдухолиқ Холиқзод зимни боздид аз рафти бунёди ин иншооти ҷашнӣ ва сӯҳбат бо ташаббускорон ба ин иқдоми онҳо баҳои баланд дода, гуфта шуд, ки дар ин маҷмааи варзишӣ ва истироҳатӣ дар мӯҳлати пешбинишуда ва бо сифату намои зебо сохта, он ба минтақаи истироҳатӣ ва баргузории мусобиқот ва машқу тамрини наврасону ҷавонони деҳа табдил дода шавад.

Гурӯҳи кории Кумитаи кор бо ҷавонон ва варзиши назди Ҳукумати Ҷумҳурии Тоҷикистон таҳти роҳбарии муовини раиси Кумита Муҳаммадтолиб Шокирзода дар ҳайати намояндаи Федератсияи байналмилалии гӯштингирӣ ва муовини раиси Федератсияи гуштини миллии Тоҷикистон зимни сафари корӣ ба Панҷакент аз як қатор иншооти варзишӣ, аз ҷумла варзишгоҳи марказӣ ва қасри “Паҳлавонони суғдӣ” дидан карда, дар маросими ҷамъбасти мусобиқа оид ба волейбол барои дарёфти Ҷоми раиси шаҳр иштирок намуданд.

Дар мулоқот бо раиси шаҳр Абдухолиқ Холиқзода иброз шуд, ки арафаи ҷашни байналмилалии Наврӯз дар шаҳри Панҷакент баргузории мусобиқаи байналмилалӣ оид ба гӯштингирӣ бо иштироки варзишгарон аз ҷумҳуриҳои Осиёи Миёна пешбинӣ шудааст.

Шароит ва ҳолати варзишгоҳи марказии шаҳр барои баргузории чунин мусобиқаи сатҳи байналмилалӣ мувофиқ дониста шуд.

Дар ин рӯз ҳамчунин муовини раиси вилояти Суғд Зуфархон Исмоилзода ва сардори раёсати кор бо ҷавонон ва варзиши вилоят Бахтиёр Исматзода аз иншооти варзишии шаҳр дидан намуда, бо варзишгарони наврас дар қасри “Паҳлавонони суғдӣ” сӯҳбат оростанд.

Мусобиқа оид ба волейбол барои соҳиб шудан ба ҷоми раиси шаҳри Панҷакент ба ифтихори 32-юмин солгарди таъсиси Қувваҳои мусаллаҳи Ҷумҳурии Тоҷикистон, ки дар толори муассисаи таҳсилоти миёнаи умумии № 47 давоми се рӯз идома дошт, бо иштироки раиси шаҳр Абдухолиқ Холиқзода ва муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Муҳаммадтолиб Шокирзода ҷамъбаст карда шуд..

Дар ин мусобиқа 18 даста аз ташкилоту массисаҳо, ҷамоатҳои деҳот байни ҳам рақобат намуда, дастаи Ҷамоати деҳоти Рӯдакӣ соҳиби ҷойи аввал, Ҷамоати деҳоти Ёрӣ ҷойи дуюм ва Ҷамоати деҳоти Ворӯ мақоми сеюмро соҳиб шуданд.

Дастаҳои ғолиб бо мукофотҳои таъсиснамудаи мақомоти иҷроияи маҳаллии ҳокимияти давлатии шаҳр -барои ишғоли ҷои аввал 12 ҳазор, ҷойи дуюм- 7000 ҳазор ва ҷойи сеюм - 5000 сомонӣ ҷом ва диплом қадрдонӣ карда шуданд

Ҳамчунин ба ҳамаи дастаҳое, ки дар мусобиқа ширкат доштанд ва ташкилкунандагони он сипосномаи мақомоти иҷроияи маҳаллии ҳокимияти давлатии шаҳр ва тӯҳфаҳои хотиравӣ тақдим карда шуд.

Арафаи Рӯзи Қувваҳои мусаллаҳи мамлакат дар қисми ҳарбии Вазорати мудофиаи кишвар ва қисми сарҳадбонии Қушунҳои сарҳадии Кумитаи давлатии амнияти миллии Ҷумҳурии Тоҷикистон воқеъ дар шаҳри Панҷакент ба муносибат ин иди ҷасорату ҷавонмардӣ ҷамъомади тантанавии ҳайати шахсӣ баргузор шуд.

Раиси шаҳр Абдухолиқ Холиқзода афсарону аскаронро бо 32-юмин солгарди таъсиси Қувваҳои мусаллаҳи мамлакат табрик гуфта, аз ҷумла таъкид намуд, ки бо талошҳои пайвастаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои мусаллаҳи кишвар муҳтарам Эмомалӣ Раҳмон нерӯҳои мусаллаҳи ҷавони мо дар як давраи кутоҳи таърихӣ ба неруи муқтадири низомӣ, муҳофизи сулҳу оромӣ ва фазои осудаи мамлакат табдил ёфта, ба Ватан ва мардуми худ содиқона хизмат мекунанд.

Гуфта шуд, ки мақомоти иҷроияи маҳаллии ҳокимияти давлатии шаҳр бо қисмҳои ҳарбӣ робитаи доимӣ дошта, барои беҳдошти шароити хидмати сарбозон пайваста мусоидат менамояд.

Дар қисмҳои ҳарбӣ барои хидмати оинномавии афсарону сарбозон захираи кофии маводи хурока ва дигар лавозимот, шароити мусоиди хидмат муҳайё буда,имрӯз барои онҳо ҳамчунин дастархони идона ороста шуд.

Таҳти ин шиор бо ибтикори мақомоти иҷроияи маҳаллии ҳокимияти давлатии шаҳри Панҷакент бо иштироки кормандони бахшҳои бонкҳо, ширкатҳои сайёҳӣ, дигар соҳибкорони шаҳр ҳашари ниҳолшинонӣ баргузор шуд.

Дар ин рӯз дар шафати шоҳроҳи Панҷакент – Айнӣ дар канори деҳаи Сӯфиён бо маслиҳати мутахассисон беш аз 200 без ниҳолҳои сӯзанбарг шинонида шуд.

Зимни боздид раиси шаҳр Абдухолиқ Холиқзода ба ташаббускорону саҳмгузорони ин аксия изҳори сипос намуда, ба масъулони шуъбаи ҳифзи муҳити зист, Ҷамоати деҳоти Халифа Ҳасан, хоҷагиҳои деҳқонии шафати шоҳроҳ дастур дода шуд, ки нигоҳубини навниҳолонро зери назорати ҳамарӯза қарор диҳанд.

Чунин ҳашару аксияҳо то анҷоми мавсими ниҳолшинонию сабзгардонӣ пайваста баргузор карда мешаванд

Имрӯз дар толори варзиши муассисаи таҳсилоти миёнаи умумии № 47-и шаҳри Панҷакент бахшида ба 32-юмин солгарди Қувваҳои мусаллаҳи мамлакат мусобиқаи волейбол барои дарёфти Ҷоми раиси шаҳр оғоз шуд.

Тавре дар паёми шодбошии раиси шаҳр Абдухолиқ Холиқзода дар маросими оғози мусобиқа гуфта шуд, мақомоти иҷроияи маҳаллии ҳокимияти давлатии шаҳр рушди варзишро пайваста зери назар қарор дода, ҳамасола барои бунёди бунёди иншоотии варзишӣ, баргузории мусобиқаҳои аз рӯи намудҳои гуногуни варзиш кори зиёде анҷом дода мешавад.

Дар мусобиқа барои Ҷоми раиси шаҳр 18 даста аз ташкилоту муассисаҳои шаҳр байни худ давоми ду рӯз сабқат менамоянд.

Ғолибони мусобиқа- барои ҷои аввал- бо ҷом ва 12 ҳазор, ҷойи дуюм -7000 ва ҷойи сеюм -5000 сомонӣ мукофотонида мешаванд.

Дар Ҷамоати деҳоти Ёрии шаҳри Панҷакент бо мусоидати мақомоти иҷроияи маҳаллии ҳокимияти давлатии шаҳр, ҷалби соҳибкорони дохилӣ ва бурунмарзӣ, сокинон корҳои ободонӣ ба ифтихори ҷашни 35- солагии истиқлоли давлатии Ҷумҳурии Тоҷикистон вусъат меёбад.

Аз ҷумла, ҳоло дар деҳаи Ёрӣ сохтмони бинои иловагии муассисаи таҳсилоти миёнаи умумии № 57, ки дорои 16 синфхона ва ҳуҷраҳои дигари корӣ хоҳад буд, идома дорад ва ҳашарчиён ба бардоштани девори қабати аввали бино машғул ҳастанд.

Раиси шаҳр Абдухолиқ Холиқзода бо рафти сохтмони муассисаи таълимӣ шинос шуда, ба ин иқдоми соҳибкорон ва сокинон баҳои баланд дод ва барои дар мӯҳлати кӯтоҳ ва бо сифати хуб анҷом додани сохтмони таълимгоҳ дастур дода шуд.

Дар ҷараёни сафари корӣ ҳамчунин бо рафти насби таҷҳизоти гармидиҳӣ дар кӯдакистони “Барно”-и деҳаи Ёрӣ, кандани чоҳи амудӣ барои бо оби нӯшокӣ таъмин намудани беш аз 200 хонавода,ки корҳои асосиаш анҷом ёфта, бо саҳмгузории соҳибкорони деҳа роҳандозӣ шудааст, таъмири бинои маъмурии Ҷамоати деҳот шинос шуда, масъулон барои тезонидани корҳо муваззаф карда шуданд.

Имрӯз дар Кохи фарҳанги шаҳри Панҷакент бо иштироки афсарону аскарони қисмҳои ҳарбӣ, собиқадорон, намояндагони ташкилоту муассисаҳо, ҷавонон бо баргузории ҷамъомади тантанавӣ Рӯзи таъсиси Қувваҳои мусаллаҳи мамлакат таҷлил карда шуд.

Дар паёми шодбошии муовини аввали раиси Маҷлиси миллии Маҷлиси Олии Ҷумҳурии Тоҷикистон, раиси вилояти Суғд, муҳтарам Раҷаббой Аҳмадзода, ки намояндаи мақомоти иҷроияи ҳокимияти давлатии вилояти Суғд, сардори раёсати маорифи вилоят Мадина Набиева ироа намуд ва сухани табрикии раиси шаҳр Абдухолиқ Холиқзода аз ҷумла зикр шуд, ки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Сарфармондеҳи Олии Қуввааҳои мусаллаҳи кишвар, генерали артиш, муҳтарам Эмомалӣ Раҳмон ба нақшу ҷойгоҳи неруҳои мусаллаҳи мамлакат, ки дар оғози даврони истиқлол, дар шароити душвори сиёсӣ таъсис шуда, имрӯз ба посбони ҳақиқии марзу буми давлат ва дастовародҳои истиқлол табдил шудааст, баҳои баланд медиҳанд.

Дар фарҷоми маҷлиси тантанавӣ ба гурӯҳ афсарони комиссариати ҳарбӣ, қисмҳои низомӣ, иштирочиёни барқарор намудани сохти конститутсионӣ сипоснома ва тӯҳфаҳои хотиравии мқомоти иҷроияи маҳаллии ҳокимияти давлатии шаҳр тақдим намуда, барномаи ҷолиби ҳунарии санъаткорони шаҳр, ки тараннумгари меҳри Ватан, сулҳу салоҳ ва ободию осудагии кишвар буд, пешкаш карда шуд.

Ба ифтихори Рӯзи таъсиси Қувваҳои мусаллаҳи мамлакат чун анъана дар ҳамаи корхонаю ташкилотҳо, муассисаҳои таълимии шаҳр ҷамъомаду чорабиниҳои идона баргузор шуданд.

Кишоварзони хоҷагии деҳқонии “Меҳнатобод”-и Ҷамоати деҳоти Халифа Ҳасани шаҳри Панҷакент имсол нахустин шуда, ба кишти барвақтии картошка шурӯъ намуданд.

Дар оғози кишт, ки бо иштироки раиси шаҳр Абдухолиқ Холиқзода ва фотиҳаи деҳқонони кордида сурат гирифт, саҳмдори собиқадори хоҷагӣ Ҳусниддин Шукуров иброз дошт, ки дар шаст ҳисса замини саҳмаш пурра картошкаи барвақтӣ кишт менамояд ва баъди ҷамъоварии он дар ин замин сабзавот парвариш хоҳад кард. Ӯ ба қадри зарурӣ барои кишти картошка тухмӣ захира кардааст.

Имсол дар ин хоҷагии деҳқонӣ дар майдони 32 ва Ҷамоати деҳоти Халифа Ҳасан дар 535 гектар картошка, ки қисми асосии он барвақтӣ аст, пешбинӣ шуда, ҳоло омода намудани заминҳо барои кишт ва шинонидани он идома дорад.

Дар ин рӯз ҳамчунин деҳқонони хоҷагии “Хуросон”-и Ҷамоати деҳоти Ёрӣ низ ба кишти барвақтии картошка шурӯъ намуданд.

Дар маҷмӯъ имсол дар хоҷагиҳои деҳқонии шаҳр дар майдони 3900 гектар кишти картошка пешбинӣ шудааст ва тибқи маслиҳати мутахассисон бояд дар 70 дарсади он картошкаи барвақтӣ, ки дар иқлими водии ҳудуди шаҳр ҳосили хуб медиҳад, кишта шавад.

Санаи 18 феврал соли 2025 бо бо мақсади шиносоӣ бо вазъи соҳаи кишоварзӣ, рафти иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар Паём ба Маҷлиси Олӣ ва дар маҷлиси васеъи Ҳукумати мамлакат таҳти роҳбарии муовини Сарвазири Ҷумҳурии Тоҷикистон Сулаймон Зиёзода, дар ҳайати вазири кишоварзӣ Қурбон Ҳакимзода, раиси Кумитаи бехатарии озуқаворӣ Муҳаммадсаид Файзуллозода, раиси Кумитаи ҳифзи муҳити зист Баҳодур Шерализода, директори Агентии хоҷагии ҷангал Абдуҷаббор Юсуфзода, директори Агентии беҳдошти замин ва обёрӣ Зафарбек Давлатзода, Президенти Академияи илмҳои кишоварзӣ Амонулло Салимзода, муовини раиси вилояти Суғд Файзулло Қосимӣ ба шаҳри Панҷакент сафари корӣ анҷом доданд.

Дар оғози боздид аъзоёни ҳайати Ҳукумати Ҷумҳурӣ дар шафати шоҳроҳи Панҷакент – Айнӣ дар ҳудуди ҷамоатҳои деҳоти Ёрӣ ва Рӯдакӣ дар ҳашари ниҳолшинонӣ иштирок намуда, бо вазъи сарбанди канали Марғедар, пойгоҳи обкашӣ дар деҳаи Боғчаи Ҷамоати деҳоти Шинг ва корҳои соҳилмустаҳкамкунии дарёи Зарафшон дар ин мавзеъ шинос шуданд.

Дар идомаи боздид бо захираи мева дар сардхонаҳо дар ҷамоатҳои деҳоти Рӯдакӣ ва Лоиқ Шералӣ, захираи тухмии картошка дар хоҷагиҳои деҳқонии ҷамоатҳои деҳоти Сӯҷина ва Халифа Ҳасан шинос шуда, ба ин иқдоми онҳо ва ба истеҳсол ва захираи фаровони пиёз дар анборҳои кишоварзони деҳаи Сӯҷина баҳои баланд дода шуд.

Дар ҷараёни сафари корӣ ҳамчунин бо фаъолияти фермаи чорводории соҳибкор Урунбек Қурбонов ва бунёди токзори нави хавозавӣ дар Ҷамоати деҳоти Лоиқ Шералӣ ошно шуда, ба истифодаи заминҳои кишт, ҳолати токзор, омода намудани заминҳо ба кишти картошкаи барвақтӣ таваҷҷӯҳ зоҳир карда шуд.

Баъди анҷоми боздидҳо дар мақомоти иҷроияи маҳаллии ҳокимияти давлатии шаҳр бо иштироки масъулони соҳаи кишоварзӣ, раисони ҷамоатҳои деҳот, сарварони як қатор хоҷагиҳои деҳқонӣ ҷаласа баргузор шуд.

Муовини сарвазири Ҷумҳурӣ Сулаймон Зиёзода зимни ташреҳи вазифаҳое, ки Пешвои муаззами миллат, Президенти Ҷумҳурии Тоҷикистон, муҳтарам Эмомалӣ Раҳмон дар Паём ба Маҷлиси Олӣ ва дар маҷлиси васеъи Ҳукумати мамлакат оид ба таъмини амнияти озуқаворӣ, истифода босамари замин ва ба ин васила афзун намудани истеҳсоли маҳсулоти кишоварзӣ ва таъмини амнияти озуқаворӣ баён доштанд, таваҷҷӯҳи ҳозиринро ба нишондиҳандаҳои истеҳсоли ғалла, сабзавот,картошка, полезиҳо, меваю сабзавот, ширу гӯшт, тухм ба ҳар нафар сокини шаҳр дар муқоиса бо меъёри муайяншудаи истеъмоли солона, ҳосилнокии зироат, ҳолати истифодаи заминҳои кишт, риояи қоидаҳои агротехникӣ дар парвариши ғалла, боғу ток, вусъат додани маъракаи ниҳолшинонӣ, ба ҷои боғу токзори кӯҳна бунёди намудани боғу токзори интенсивӣ, бо оби полезӣ беҳтар таъмин намудани заминҳои кишт, дар маҷмӯъ маданияти кишоварзӣ ҷалб намуд.

Таъкид карда шуд, ки истеҳсоли картошка ва шолӣ дар маҷмӯи маҳсулоти кишоварзии шаҳр ҷойгоҳи хоса дошта, бо супориши Ҳукумати мамлакат истеҳсоли онҳо, хоса картошка, бояд зиёд карда шавад. Дастур дода шуд, ки дар 70 фоизи заминҳои дар хоҷагиҳои кишоварзӣ барои кишти картошка пешбинишуда бояд дар моҳҳои феврал ва март кишти барвақтии ин зироат, ки дар шароити ҳудуди ҳамвории шаҳр ҳосили хуб медиҳад, гузаронида шавад.

Дар ҷаласа ҳамчунин оид ба таҳияи лоиҳаи ба як маҷро гирифтани дарёи Зарафшон, баҳисобгирии саҳеҳи заминҳои кишт, ташкили хоҷагӣ оид ба истеҳсоли тухмии картошка, такмили қонун оид ба хоҷагиҳои деҳқонӣ, норасоии кадрҳои соҳаи кишоварзӣ масъалагузорӣ сурат гирифта, ба саволу дархости иштирокчиён посух гуфта шуд.

Бо раҳнамоӣ ва Амри Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ҳамасола фестивали ҷумҳуриявии “Сад ранги чакан” баргузор мешавад.

Дар ҳамин замина дар шаҳри Панҷакент бо ибтикори мақомоти иҷроияи маҳаллии ҳокимияти давлатии шаҳр даври шаҳрии ин озмун бо иштироки доираи васеъи бонувони ҳунарманди шаҳр баргузор шуда, беҳтаринҳо бо диплому тӯҳфаҳои хотиравӣ қадрдонӣ гардида, ба даври вилоятӣ роҳхат гирифтанд,

Чакан чун навъи гулдӯзии тоҷикӣ бо пешниҳоди Тоҷикистон соли 2018 ба Феҳристи мероси башарии созмони ЮНЕСКО шомил шуда буд. Дар сомонаи ин созмони фарҳангии Созмони Милали Муттаҳид он чун “як навъи гулдӯзии миллӣ дар матоъҳои пахтагӣ ва абрешимӣ, ки бештар дар байни занону духтарони тоҷик ривоҷ ёфтааст”,ташреҳ шудааст.

Дар суратгузориши зер ҷилваи рангҳои ин ҳунари миллии тоҷикӣ инъикос шудааст.

Мубориза бо терроризм ва экстремизм самти афзалиятнок ба шумор меравад, зеро ин зуҳурот ҳоло ба хатари глобалӣ мубаддал гардида, тамоми аҳли башарро ба ташвишу нигаронӣ овардааст- таъкид шудааст дар Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии мамлакат.

Масъалаҳои мубориза бо ин падидаҳои хатарзо дар доираи талаботи”Стратегияи муқовимат бо экстремизм ва терроризм дар Ҷумҳурии Тоҷикистон барои солҳои 2021-2025” бо ибтикори мақомоти иҷроияи маҳаллии ҳокимияти давлатии шаҳр ва прокуратураи шаҳри Панҷакент дар ҷамъомади васеъ бо иштироки кормандони масъули мақомоти иҷроия, ҷамоатҳои деҳот, муассисаҳои таҳсилоти миёнаи умумӣ, коллеҷу донишкада, имом- хатибони масоҷид мавриди баррасӣ қарор гирифт.

Дар ҷамъомад зимни баррасии рафти иҷрои стратегияи мазкур зарурати боз ҳам тавсеа додани кор дар ин самт, ба насли ҷавон фаҳмонидани хатари терроризму экстремизм ба низоми давлат ва ҷомеа, пешгирии ифротишавии баъзе ҷавонон, мубориза бо ифротгароии динию мазҳабӣ, тарбияи насли ҷавон дар рӯҳияи худшиносию ватандӯстӣ, арзишманд донистани фазои сулҳу субот дар ҷомеа таъкид карда, аз онҳо даъват ба амал оварда шуд, ки дар мубориза бо ин падидаҳо, ки барои низоми ҷомеа, фазои сулҳу субот, рушди иқтисодию иҷтимоӣ хатарзо мебошанд, бетараф набошанд ва дар ин самт мавқеи фаъоли ҷамъиятӣ дошта бошанд.

Дар хонаи ин бонуи ҳунарманди гулдаст ба рағми сардиҳои зимистон худро дар оғӯши баҳор эҳсос менамоед.

Сӯзанию гулдӯзиҳои ҳарранга, болопӯшу хилъатҳои зебою ҳарири арӯсӣ, кӯрпаю болиштҳои қуроқӣ, хӯрҷину гилемчаҳои дастибофт, ҷомаҳои хушдӯхт ҳунари дасти сокини деҳаи Бедаки Ҷамоати деҳоти Косатароши шаҳри Панҷакент Мамлакат Ёрова аст, ки барои арӯсони деҳа, дигар талабгорони ҳунари зебои қадимаи миллӣ ҳамроҳи аҳли оила ва шогирдонаш меофарад.

Раиси шаҳр Абдухолиқ Холиқзода зимни сафари корӣ ба ҷамоати деҳот бо маҳсули дасти ин бонуи ҳунарманд шинос шуда, ба ӯ аҳсану офарин хонд.

Дар сӯҳбат ӯ иброз дошт, ки ҳанӯз аз замони наврасӣ ба ҳунари дӯзандагию бофандагӣ ва гулдӯзӣ шавқ дошт ва ба тадриҷ ҳунараш ривоҷ ёфту ба аҳли оила ва даҳҳо нафар духтарони деҳа онро омӯзонд, маҳсули дасташро борҳо дар намоишҳои гуногун, дар иди Наврӯзу Сада манзури ҳамдиёрон намуд, даҳҳо нафар гулдухтарони зодгоҳаш ва ҳамсоядеҳаҳо аз маҳсули дасти ӯ барои ҷиҳози арӯсӣ мехаранд.

Ба ин бонуи гулдӯз тавсия дода шуд, асрори ҳунарашро ҳарчи бештар ба духтарони деҳа омӯзонад, онро бештар пешкаши харидорону шавқмандон, сайёҳон намояд, то ин анъанаи мардумӣ ва ин ҳунари миллӣ минбаъд низ побарҷо бимонад.

Бо дастгирии мақомоти иҷроияи маҳаллии ҳокимияти давлатии шаҳри Панҷакент ва сармоягузории соҳибкор Абдушафеъ Ҳоҷиев корҳои таҷдиду таъмир дар маркази тиббии “Шифо”, ки дар яке аз гӯшаҳои зебои шаҳр воқеъ гаштааст, бо маром идома меёбад.

Зимни боздиди раиси шаҳр Абдухолиқ Холиқзода иттилоъ дода шуд, ки ин ҷо ҳоло баробари азнавсозии бинои асосӣ, сохтмони маркази оши палов, ҳавзи моҳипаварӣ, ҳамчунин ба бунёди варзишгоҳ шурӯъ намудаанд.

Варзишгоҳ дар масоҳати 45 ба 22 метр бо тарҳи замонавӣ ва фарши сунъӣ бунёд шуда, барои бозиии футбол, волейбол ва машқҳои дигари варзишию солимгардонӣ пешбинӣ шудааст.

Бо бунёди чунин иншооти табобатию солимгардонӣ маркази тиббии “Шифо” дар ояндаи наздик ба ҷои табобобату истироҳат барои сокинону меҳмонони шаҳр табдил меёбад.

Намояндаи Ҳукумати Ҷумҳурӣ, Президенти Академияи миллии илмҳои Тоҷикистон Қобилҷон Хушвақтзода дар сафари кории худ ба шаҳри Панҷакент ба китобхонаи марказии шаҳр ва муассисаи таҳсилоти миёнаи умумии № 70, деҳаи Порвени Ҷамоати деҳоти Ворӯ беш аз 700 нусха китобҳои бадеӣ, илмӣ ва дастурҳои методӣ тӯҳфа намуд.

Китобҳои арзишманд дар бораи нақши эҳёгарии Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, Фарҳанги тоҷикӣ-русӣ, “Зод-ул- мусофирин”-и Носири Хисрав, рисолаҳои илмӣ дар бораи устод Рӯдакӣ, Абӯалӣ ибни Сино, фалсафа, таърих, илмҳои дақиқ, китобҳои бадеӣ аз ҷумлаи ин адабиёти тӯҳфашуда аст.

Аз мутолиаи ин китобҳо хонандагони китобхонаҳои шаҳр ва муҳассилини таълимгоҳи ин деҳаи дурдаст, ки аз оғози соли ҷории хониш дар бинои нав, ки бо дастгирии мақомоти иҷроияи ҳокимияти давлатии вилояти Суғд ва шаҳр бунёд шудааст, таҳсил мекунанд, баҳраи маънавӣ мебаранд ва ба Президенти Академияи миллии илмҳои Ҷумҳурӣ барои чунин тӯҳфаи арзишманд изҳори сипос менамоянд